Reportajen estudante estajiadu UNTL, Joanina Casemiro
Eskola Bazíku Centro (EBC), Postu-Administrativu Laclubar Munisipiu Manatutu menus fasilidade hanesan meza, kadeira nune’e fó impaktu ba estudante sira, atu tuir prosesu aprendizajen iha aula
Ba Neon Metin Sekretária Ossis EBC Laklubar, Eufrasia S. Calado hateten nu’udar estudante sente triste tebes, haree ba kondisaun eskola nian, tanba durante eskola hasoru problema barak hanesan kadeira, meza, odamatan, vidru eskola nian.
“Hanesan estudante iha eskola ida ne’e, sente triste tebes hasoru problema barak, tanba ami nia fasilidade la Kompletu dalaruma estudante na’in rua tolu tur hamutuk hodi simu materia husi professores sira entaun halo ami konsentrasaun laiha, susar mai ami atu aprende ho di’ak,” Dehan Eufrasia Ba Noen Metin iha EBC Postu-Administrativu Laclubar Munisipiu Manatuto 2/06.
Nia dehan kuaze tinan 10 to’o ohin loron, sira nia eskola seidauk hetan meza ho kadeira foun husi Ministériu Edukasaun Juventude Desportu (MEJD), nune’e sira kontinua tur ema na’in rua ou tolu hamutuk hodi tuir prosesu aprendizajen.
Relasiona ba problema hirak ne’e, estudante Eufrasia rekomenda ba parte relevante liu-liu ba MEJD hodi bele ajuda lalais ba estudante sira nia preokupasaun hodi tuir ezame nasionál ho di’ak tanba hela fulan balu estudante sira sei hasoru Ezame Nasionál ano letivu 2022.
Iha fatin hanesan, Diretór EBC Laclubar, Francisco M. Soares rekoñese katak loos duni liga ba estudante sira nia preokupasaun ne’ebé sira informa kona-ba fasilidade la Kompletu, tanba durante ne’e fasilidade refere husi SEJD liu husi aderi nian iha 2012 to’o ohin loron, bele dehan nia durasaun ne’e tinan 10 entaun balu komesa aat ba daudaun ona.
Diretór haktuir durante ne’e husi parte eskola hato’o ona pedidu ba iha Ministériu Edukasaun Juventude Desportu liu husi diresaun Edukasaun Munisipál nian, maibe to’o agora seidauk hetan resposta.
