Reportazen Zevonia Vieira
Societas Verbi Divini (SVD) Rejiaun Timor-Leste hasai deklarasaun imprensa hodi koriji informasaun mak sirkula iha media (facebook, instagram, whatsapp, etc) relasiona ho julgamnetu ba kazu violensia sexual mak halo hosi Eis-Padre Richard Daschbach. Neon Metin simu deklarasaun imprensa ne’e ohin (12/03), hosi Superior Regional Timor-Leste, Pe. Yohanes Suban Gapun, SVD. Press release on RDs case (1).pdf
Iha deklarasaun imprensa ne’e SVD Regional Timor-Leste nian hatete RD laos ona padre tuir desizaun Komgregasaun Dutrina da Fe nian iha Vatikanu, iha 6 Novembru 2018.
“Liu hosi komunikadu imprensa ne’e, ami SVD rejiaun Timor-Leste, hakarak afirma empatikamente katak bazeia ba krimi grave ne’ebe kometidu no admitidu kona ba abuzu sexual ba menor sira iha Uma Mahon Topu Honis, mak Sr. Richard Dascbach hetan demisaun hosi estadu religioso ho klerikal husi Congregação para a Dourtina da Fé iha Vatikanu”, komunikadu imprensa ne’e haktuir
SVD nia komunikadu imprensa ne’e mos expresa solidaridade ba vitima violensia sexual no sira nia familia.
“Dala ida tan, ami hakarak expresa ami nia solidaridade ba vitima sira no sira nia familia”, komunikadu imprensa ne’e hatete.
Kazu Topu Honis mak nudar kazu pedofilia ne’ebe mosu ba publik dahuluk iha Timor-Leste. Kazu ne’e involve eis-Padre Richard Dascbach hosi kongregasaun SVD nian. Ho rezultadu investigasaun Kongregasaun Dutrina ba Fe nian iha Vatikanu, Amo Papa Francisco hasai tiha ona Richard Dascbach nudar padre iha tinan 2018. Eis-Padre ne’e agora dadaun tuir hela prosesu justisa ho kondenasaun kazu pedofilia, pornografia no violensia domestika.
