Reportajen David da Costa
Dadaun ne’e Timor-Leste hasoru hela problema konaba kaderneta pasaporte, tanba ne’e governu agora esforsu hela, iha tempu badak kaderneta pasaporte 16 mill, sei to’o iha Timor-Leste, no pasaporte 16 mill ne’e prevee orsamentu 212 mill.
Ministru Justisa (MJ) Tiago Amaral Sarmento hateten progresu pasaporte Timor-Leste ninia, iha dia 13 Abril foin lalais halo tiha ona aprovasaun ba kaderneta pasaporte, no mos seguransa pasaporte ninia, prosesu ne’e hahú husi fulan Fevereiru.
“Kuandu iha 26 Janeiru, dekretu lei kona-ba ezekusaun orsamentál promulga, ami prosesa kedas iha Febreiru, Ami reuniaun kedas ho Kompañia Tales internasional, halo prosesu tuir lei aprovizionamentu Timor-Leste ninia. Halo ajusta direita, oras ne’e dadauk kompañia tales internasional halo ona prosesu,” dehan Ministru Justisa Tiago Amaral, iha Palásiu Governu, Kuarta 26/04.
Nia hatutan, iha 13 Abril aprova ona ninia dezeñu no seguransa , tanba seguransa ne’e husi internasional Civil Aviation (ICA) maka ezije pais hotu hasa’e ninia kualidade, no ninia nivel seguransa, Timor-Leste mós inklui hotu.
“Ami resolve ona, kontratu iha tiha ona ho kompañia Tiles, ba aprovasaun kaderneta no mós seguransa ninia, oras ne’e dadauk iha ona fase ikus liu, hein para sira emite kaderneta pasaporte. Agora prosesu ida ne’e uluk ami husu sira para depois sira prosesa lalais”, esplika nia.
Nia salienta prosesu kona-ba imprime pasaporte husi kompañia Tales Internasional, no kaderneta pasaporte ne’e imprime iha nasaun Finlándia, no valida iha Fransa no seguransa iha fatin seluk tan fali, “Entaun governu koalia ona ho kompañia, para depois iha tempu badak sira bele fornese lalais, tanba pasaporte nia stock kuaze atu laiha ona, “ita presiza lalais pasaporte, entaun ami koordena nafatin ho parte Kompañia Tales, para depois sira mós halo esforsu ida, atu bele Imprime kaderneta para fonrese lalais mai Timor-Leste”.
“Ba Provizóriu ami hakarak haruka uluk lalais mai 16 mil para atende lalais ba situasaun, tanba ita nia ezijénsia agora ema barak presiza hanesan estudante, traballador ba liur, sira tenke haruka uluk balu-balun mai ona, para depois atende lai, depois maka kontinua, no produs pasaporte 16 mill ho orsamentu $212 mill,” nia afirma.
