Reportajen David da Costa
Governu liuhusi reuniaun Konsellu Ministrus (KM), aprova mós projetu Dekretu Governu nian, ne’ebé aprezenta husi Ministra Negósius Estranjeirus no Kooperasaun, (MNEK), ne’ebé Regulamenta Medida sira ba Protesaun Sidadaun Timoroan sira iha rai-li’ur.
Porta Voz Governu, Prezidénsia Konsellu Ministru (PCM), Fidélis Leite Mangalhães, hateten, ho Dekretu Governu ida-ne’e halo regulamentasaun ba medida protesaun ba sidadaun timoroan sira iha rai-li’ur. Ne’ebé prevee iha Dekretu-Lei n. 77/2022, loron 26, fulan-Outubru, permite ninia aplikasaun ba parte servisu administrasaun públika nian.
“Maske kuadru normativu fundamentál ne’ebé presiza hodi fó protesaun ba timoroan sira iha rai-liur aprova ona, presiza halo aprovasaun tan ba norma jurídika sira ne’ebé sei operasionaliza aplikasaun konkreta husi medida protesaun sira ne’ebé temi ona,” dehan Porta Voz governu Fidélis Mangalhães, iha Palásiu Governu, Kuarta 26/04.
Tuir diploma ne’ebé refere, konstitui ho medida sira ba protesaun sidadaun timoroan iha rai-li’ur, no hodi fó tulun karik iha kazu katástrofe naturál, ka ho perturbasaun grave ba orden públika, hodi lori filafali mai timoroan sira iha rai-li’ur, apoiu ba emerjénsia ba alojamentu, apoiu hahán emerjénsia nian no apoiu karik iha kazu tama prizaun ka detensaun.
