Reportajen David da Costa
Porta Voz Governu, Prezidénsia Konsellu Ministru (PCM), Fidélis Leite Mangalhães hateten Governu liuhusi reuniaun Konsellu Ministrus (KM) delibera ona atu aprova, tuir projetu ne’ebé aprezenta husi Ministru Defeza, ba realizasaun ba prosedimentu exesionál ba rekrutamentu militár nian no hahú husi fulan-maiu tinan 2023 no determina ona katak efetivu atu inkorpora iha prosedimentu ida-ne’e inkorporasaun sei rekruta hamutuk ema na’in 87.
“Ohin dader ha’u rasik hanesan Ministru Defeza em Ezersisiu, ha’u maka aprezenta ba iha Konsellu Ministru, Proposta ida atu inkorpora foinsa’e sira 87, sira ne’ebé maka iha grau akademika Lisensiadu no Mestradu iha area importante sira ne’ebé maka FFDTL persiza,” dehan Porta Voz governu Fidélis Mangalhães, iha Palásiu Governu, Kuarta 26/04.
Nia hatutan, ida ne’e dalan ida mos tau kontinua profisionaliza FFDTL, tanba mundu modernu agora ne’e, Forsa Defesa ida mós persiza, liuliu ba maluk sira ne’ebé maka iha duni grau akademiku sira no ba iha espesialidade sira, ne’ebé bele kontribui ba FFDTL, para sai Forsa Defesa ida ne’ebé maka konvensional i modernu. Ho ida ne’e maka governu loke dalan hodi halo inkorporasaun deit ba sira iha FFDTL, ne’e mós hanesan dalan espesial ida ba sira para bele tama iha FFDTL.
Entertantu ema nain 87 ne’e sei fahe tuir nia komponente husi Militár na’in 29 ba Kuartél Jenerál, militár na’in 10 ba Komponente Terrestre, Militár na’in 12 ba Komponente Navál, Militár na’in 6 ba Komponente Aérea Lijeira, militár na’in 5 ba Sentru Instrusaun Komandante Nicolau Lobato, Militár na’in 18 ba Unidade Apoiu Servisu, militár na’in 4 ba Unidade Polísia Militár, no problem ikus liu militár na’in 3 ba Unidade FALINTIL.
