Reportajen Joselina Dos Santos
Sekretaria Estadu ba Igualdade no Inkluzaun (SEII), realiza seminariu nasional ho tema “Hametin Paz no Seguransa Hodi Eleva Igualdade Inkluzaun iha Ambitu Eleisaun Parlamentar 2023 hodi garantia estabilidade partisipante votante ho seguru.
Iha abertura seminar ne’e, Diretór Jeral SEII, Armando da Costa hatete SEII hamutuk ho parseiru Feto Prontu Lidera organiza Seminariu Nasional kona-ba Paz no Seguransa husi perspetiva igualdade Inkluzaun iha eleisaun parlamentar 2023, objetivu husi Seminariu ne’e hakarak atu instituisaun relevante sira fornese servisu publiku relasaun ba elisaun parlamentar nian, hodi asegura partisipasaun votante iha eleisaun ho másimu.
“Seminariu nasional ne’e atu asegura kandidata feto sira hola parte iha prosesu Eleitóral eleisaun parlamentar 2023 nian, nune’e mos atu asegura sidadaun hotu espesifikamente ba sira ne’ebe nesesidade espesial hanesan ema ho difisiensia no mos ba inan isin-rua, hodi hala’o sira nia direitu votu ho seguru no hakmatek”, Dehan Diretór Jeral SEII Armando da Costa, iha Salaun Hotel Delta Nova, kinta 04/27.
Iha fatin hanesan, Senada Faculdade Ciência Politica Cesarina Albertina, apresia tebes bele partisipa iha Seminariu Nasional ida ne’e, tanba laos ema hotu bele hatene objetivu nu’udar sosiedade ida ne’ebe atu ezerse nia direitu votu ba partidu ne’ebe sira hili.
“Informasaun sira ne’ebe ohin ha’u hetan iha seminariu ne’e, ha’u sei fahe ba maluk sira ne’ebe la partisipa. Ne’e duni nu’udar akademiku ita nia pozisaun hanesan elementus ne’ebe atu partilla informasaun relevante ba sosiedade”, dehan nia.
Seminariu ne’e partisipa husi sosiedade sivil, Estudante UNTL, UNDIL, Juventude, lider komunitariu, Igreja, CNE-STAE nomós organizasaun Ema ho Difisiensia sira. Sira iha espesiku idak-idak PNTL foka ba oinsá atu asegura ema ho nesesidade espesial feto ferik katuas no ema ho difisiensia atu iha espasu partisipa ho seguru, no CNE-STAE hanesan orgaun ne’ebe organiza eleisaun oinsa ho sira nia prosesu tomak hodi partisipa votasaun.
