Reportajen Silvino Freitas
Partidu Asosiasaun Popular Monarquia Timorense (APMT) realiza konferénsia imprensa hodi fo parabéns ba traballadór sira iha instituisaun públiku no privada, ne’ebé komemora loron mundiál traballadór nian, no promete bainhira povu fo fiar sei tau matan ba traballadór infantíl, doméstika no hasa’e saláriu mínimu ba $200.
Serziana de Jesus Sekretária Jerál Organizasaun Muller Partidu (OMP) hateten, aproveita loron traballadór sira nian ne’ebé ema hotu selebra iha mundu nomós Timor Leste laran tomak, APMT foka liu ba traballadór infantil nomós trabaladora domestika iha nasaun RDTL durante ne’e APMT observa katak durante ne’e iha larabarik barak ne’ebé lakon sira nia direitu hodi ajuda sira ninia inan-aman buka moris sustenta sira nia família fa’an ai-fuan no manu-tolun.
“Tanba ne’e karik povu fó fi’ar ba APMT maka sei tau importánsia ba asuntu ida ne’e, haree fali ba iha traballadora domestika iha ita nia maluk barak ne’ebé saláriu mínimu, sei tau mós formasaun hodi hasa’e traballadór sira nia kapasidade liuliu iha formasaun otelária hasa’e sira nia skill ba atendiementu” Serziana Promete liuhusi konferénsia imprensa ne’ebé hala’o iha uma-adat tasi-tolu, (01/05).
Fatin hanesan Prezidente Organizasaun Juventude Partido (OJP) Manuel Mesquita haktuir, APMT mós parabeniza traballadór sira iha mundu espesialmente Timor Leste ne’ebé komemora loron mundiál ba traballdór, hodi louva sira nia servisu ne’ebé serví ba rai no povu ida ne’e iha seitór privada no públika ba sira nia kontribuisaun ba dezenvolvimentu nasaun nian.
“APMT haree katak husi tinan 20 observa iha timor seida’uk tau atensaun masimu ba saláriu mínimu ne’ebé trabaladór sira infrenta, nesesidade merkadoría hahú aumenta maibé la tau importánsia ba saláriu, tanba ne’e karik hetan fi’ar husi povu iha 21 de maiu sei aposta ba kestaun ida ne’e hodi hasa’e saláriu mínimu $200 no masimu tuir dezempenu servisu” Manuel mós promete.
Nia dehan tan katak, APMT sei halo revizaun ba saláriu sira ne’ebé intituisaun empreza publika no instituisaun publika iha liuliu dekretu lei ba saláriu tuir rezultadu servisu ne’ebé halo, tanba dadaun nee iha dezenvolvimentu ne’ebé povu seidauk hasesu ho di’ak maibé lideransa sira nia saláriu liu $5000 to $6000, tanba hamosu diskrimisaun ne’ebé bo’ot iha nasaun ida ne’e.
