Reportajen Umbelina dos Reis
Iha kampaña eleitorál Partidu Kmanek Haburas Unidade Nasional Timoroan (KHUNTO) ho númeru sorteiu 5, kontinua hala’o nia kampaña polítika iha Munisípiu Bobonaru, Postu Administrativu Atabae, KHUNTO preokupa ba povu ne’ebé moris seidauk dignu, oinsá atu hetan rendimentu kada mensál ne’ebé sufisiente ba sira nia moris, nune’e KHUNTO hakarak investe iha agrikultura no pekuária iha Atabae.
Prezidente Partidu KHUNTO, Armanda Berta dos Santos hateten, nia preokupa ba povu ne’ebé mak moris seidauk dignu, no oinsá atu hetan rendimentu kada mensál ne’ebé sufisiente, atu sira bele sente valor husi ukun-aan ida ne’e. Tanba bainhira KHUNTO hale’u teritóriu Timor laran, haree povu herik ba moris di’ak.
“Bainhira povu kontinua fó fiar ba KHUNTO hodi ba hola parte iha governu konstitusional da-sia mai ne’e, ba Atabae oan sira, KHUNTO sei fó prioridade ba setór oi-oin, liu-liu iha setór agrikultura no pekuária. Setores rua ne’e esensial tebes atu dezenvolve di’ak liu tan, tuir standar modernu, hodi hasa’e rendimentu kada família nian,” dehan Prezidente KHUNTO Armanda iha Munisipiu Bobonaro, liu hosi live Pájina KHUNTO ne’ebé Neon Metin asesu, 03/05.
Iha parte sorin, Konselleiru Partidu KHUNTO Jose dos Santos “Naimori Bucar” hateten, KHUNTO mai iha ne’e la’os atu haketak, maibé atu halibur, hodi mehi ba povu nia mehi. Mehi ba hametin unidade nasionál no moris di’ak
Entretantu, Atabae-oan Pedro dos Reis iha nia intervensaun polítika hatete, ha’u hamriik iha ne’e reprezenta família tomak Atabae no Bobonaro oan tomak, ha’u hamriik iha ne’e hodi hatudu imi hotu nia domin boot tebes ba ha’u, hodi ikus-mai KHUNTO fó konfiansa, ba asume Ministru Agrikultura no Peskas.
Komísiu Eleitoral ida ne’e hetan observasaun direita husi ekipa ofisiál CNE no PDHJ.
