Reportajen Silvino Freitas
Relasiona ho sidadaun Indonesia ne’ebé asesu ba kartaun eleitorál Timor Leste deskonfia fasilita husi partidu politiku balun maka deputadu iha parlamentu nasionál husi bankada Frente Revolusionáriu Timor Leste Independente (FRETILIN) husu presiza hala’o investigasaun no labele hateten de’it iha palku kampaña eleitorál.
Deputadu Parlamentu Nasional husi bankada FRETILIN Antonino Bianco hateten, kona-ba fasilita kartaun eleitorál ba estranjéiru ne’e presiza hala’o investigasaun ba ema hirak ne’ebé denunsia informasaun no ema hirak ne’ebé levanta informasaun refere atu povu bele hatene, nune’e mak bele dehan defende estadu direitu no demokratiku, nomós partidu ne’ebé hetan kondenasaun bele defende an lori prósesu ne’e ba iha tribunál nomós lider partido ne’ebé duun ema.
“Ema Indonesia ne’ebé mai polisia tenke ka’er tanbasá maka tama Timor Leste, ha’u hanoin embaixada Indonesia tenke hatene tanba lei Indonesia la fó ema dupla sidadania, karik nia mai iha ne’e entaun nia perde nia sidadania iha Indonesia embaixada Indonesia tenke hatene ida ne’e” dehan deputadu Bianco iha sede bankada FRETILIN, (15/05).
Nia dehan, Indonesia nia lei proividu ba ema ka sidadaun ne’ebé dupla sidadania maibé Timor Leste maka iha dupla no tripla sidadania, husi kazu ne’e estadu Timor Leste no Indonesia bele tau matan, nune’e mós gerasaun Timoroan balun iha Indonesia hodi goja sira nia direitu hanesan sidadaun Indonesia hodi servisu ba malu, nune’e labele uza fali palku kampaña hodi du’un tun no sa’e hodi lori informasaun laloos hanesan matéria kampaña, nune’e husi investigasaun maka bele hatene ba sidadaun estranjéiru ne’ebé asesu ba katarun eleitorál Timor Leste nian.
