Reportajen Umbelina dos Reis
Durante debate públiku entre Partidu Polítiku sira iha Salaun Mahoka Prezidente Ramos Horta hato’o katak, 21 de Maiu loron votasaun ba eleisaun parlamentar 2023, laiha Partidu ida manan no lakon tanba ita nia demokrasia no polítika sei kontinua la’o nafatin.
“Sidadaun sira ne’ebé iha liur hanesan iha rai Austrália, Indonésia, Nova-Zelandia, Portugal, Korea Sul, Thailandia, Filipina, Inglaterra, Brazil, ne’ebé namkari iha mundu ne’ebé akompaña karik, hateten ba sira imi tenki orgullu ba partidu no líder polítiku sira inklui povu,” dehan Prezidente Ramos Horta iha Salaun Mahoka, 18/05.
Tanba iha mundu Timor-Leste hetan klasifikasaun boot tebes ba demokrasia. Tuir reporter fronteira fó ba Timor-Leste númeru sanulu 10 iha klasifikasaun mundial, ne’e duni orgullu ba ita Timor oan.
“Loron 21 ita ba vota hotu-hotu manan, no demokrasia sei manan hodi hakle’an ba rai ida ne’e, ha’u la dehan ida lakon, ida manan, maibé hotu-hotu manan, se sente ida lakon, ne’e ita ida la lakon nia vida, maibé loron 22 de Maiu demokrasia polítika kontinua.” dehan Horta
Xefe Estadu ne’e hato’o katak Novembru parese iha eleisaun munisipiu lokal nian, portantu eleisaun foun sei mai tan partidu polítiku balun se la manan agora, sei manan iha munísipiu hodi kontrola iha munísipiu, depois tempu ba tinan lima ne’e la’o lalais loos, ne’e duni sei lakon lalika triste ba númeru ne’ebé ita hakarak.
