Home Notisia Gaspar Afonso: Ema ho difisiente Bele Sai Ajente Transformador

Gaspar Afonso: Ema ho difisiente Bele Sai Ajente Transformador

77
0
(Foto:Blind Union)

Adroaldo Saretukau

Diretor Ezekutivu Asosiasaun Halibur Difisiente Matan Timor-Leste (AHDMTL) Sr. Gaspar Afonso, expresa ninia urgulho ba iha partisipasaun ema ho defisiensia matan iha formasaun lian Português. Nia expresa ida iha tempu taka kursu lian Portugues loron liuba (28/08) iha hala’o iha sede AHDMTL, Manleuana, Dili.

“Timor ida agora Timor ida ke globalizasaun Timor kompetitvu ho kapasidade la’os ho fíziku. Ema ho difisiente sai ajente transformador, sai modelu ba joven sira seluk. Ha’u dehan joven ho difisiensia matan ka difisiénsia sira seluk ne’ebé mak baruk teen di’ak liu fila ba foho lalika mai hela iha Díli, liu-liu AHDMTL nia membru sira kuandu mai baruk ten estuda”, Gaspar hato’o.

Gaspar mos hatete katak, “Matenek la’os absoluta, matenek ne’e relative. Labele kontente ho sertifikadu, la’os ida ne’e, ema haree ba ita nia prátika, ita nia komportamentu, ita nia envolvimentu iha sosiedade inklui mós joven sira la ho difisiente. Tanba hatene katak ha’u nia matan mak disisiensia maibé ha’u nia kakutak la difisiénsia. Joven sira la hó difisiénsia mos hanesan se imi baruk teen estuda, imi mak difisiénsia ami la difisiénsia.”

Expresaun hanesan hato’o hosi Diretora Ezekutiva Community Based Rehabilitation Network in Timor-Leste (CBRNTL) Sra. Norberta Vicente Soares da Cruz, no agradese ba servisu hamutuk mak halo ona ho Embaixada Portugal.

“Agradese tebes tanba Ita bele servisu hamutuk hodi hala’o formasaun ida ne’e ba ita nia maluk joven feto no mane ho difisiénsia no joven ne’ebé la ho difisiénsia durante fulan lima nia laran, ami mos la haluha agradese ba iha Embaixada Portugal iha Timor-Leste ho ni-nia suporta mak ita halo programa ida ne’e durante fulan lima nia laran. Ami la haluha koperasaun servisu mak CBRNTL halo hamutuk ho AHDMTL hodi realiza formasaun ida ne’e durante fulan lima nia laran. CBRNTL servisu hamtuuk ho AHDMTL hodi estabele sentru formasaun ida ne’e, nune’e joven sira sira bele partisipa iha formasaun kursu Língua Portugés ida ne’e”, Diretora Norberta hato’o.

Norberta fo parabens ba iha maluk estudante sira, ne’ebe mak ho komitmentu boot partisipa iha formasaun durante fulan lima nia laran. Hosi rezultadu ne’ebé mak ita hetan di’ak tebes. Ita iha estudante hamutuk 70, ema ho difisiénsia hamutuk 30 no ema la ho difisiénsia hamutuk 40. Ida ne’e hanesan orgullu boot ba ita hotu. Ami kontente tebes tanba ema ho difisiénsia mós hola parte iha formasaun ida ne’e no iha komitmentu tebes.

Difisiente Matan ida, Adriano dos Santos Estudante hato’o lian obrigado ba CBRNTL, AHDMTL no Embaxada Portugal mak fo ona opurtunidade formasaun ba ema ho defisiensia sira.

“Agradese ba CBRNTL, AHDMTL ne’ebé kolabora ho embaixada Potugal hodi loke formasaun Língua Portugés ida ne’e mai ami. Ami aprende la fasil, difísil tebes tanba la’os ita nia Língua. Ami agradese tanba ami ho difisiénsia matan bele aprende Lian Portugés. Ita sei la halo buat ruma se wainhira ita la aprende”, Adriano hatete.

“Ami iha direitu atu aprende iha fatin ne’ebé de’it, formasaun saída de’it ami bele aprende, la’os katak ami ho difisiénsia matan labele aprende. Agradese mós ba kolega lahó difisiénsia ne’ebé aprende hamutuk ho ami”, Adriano aumenta dehan.

Formasaun ida ne’e hetan Suporta hosi Embaixada Portugal, Institutu Camões ho koperasaun entre Community Based Rehabilitation Network in Timor-Leste (CBRNTL) no Asosiasaun Halibur Difisiente Matan Timor-Leste (AHDMTL) ne’ebé partisipa hosi estudante universitáriu sira, Asosiasaun difisiente Timor-Leste (ADTL), FONGTIL.

 

LEAVE A REPLY

Please enter your comment!
Please enter your name here