Reportajen Silvino Freitas
Prezidente Parlamentu Nasionál, Aniceto Guterres husu partidu polítika sira tenke simu rezultadu eleisaun tuir dalan demokrátiku, no hirak ne’ebé derota nafatin servisu ba povu ida ne’e, tanba manan iha eleisaun ne’e vitória povu nian nomós povu sei halerik nafatin ba infrastructure bazika iha baze.
Prezidente Parlamentu Nasionál Aniceto Guterres hateten, durante prosesu eleitorál situasaun la’o ho di’ak to’o mai iha eleisaun hanesan sidadaun ida tenke iha ho maduru hodi ezerse direitu demokratiku iha Timor Leste nune’e situasaun la’o di’ak to’o kontajen votu inklui formasaun governu no parte hotu bele asume nia vitória no hirak ne’ebé lakon mós bele asume.
“Karik iha fraude ka krime ruma iha dalan atu bele rezolve buat hotu mantein kalma la’o tuir regra no lei ne’ebé preve tiha ona” dehan Aniceto hafoin ezerse nia votu iha eskola Faról Dili, (21/05).
Nia dehan, rezultadu eleisaun ne’e la’o di’ak hodi fó satisfasaun ba povu katak povu mak manan, tanba partido ne’ebé manan atu servi povu no ukun hadi’a eru sira nune’e bele benefísia povu” nia dehan.
Nia klarifika tan katak, partido sira ne’ebé manan tenke ukun no servi povu ho didi’ak no hirak ne’ebé lakon labele lakon vontade servisu makaas ba interese estadu tanba lakon ohin, loron ida sei manan atu bele atinji esperánsa no espetativa.
“Tinan ruanulu depois retaurasaun indepedénsia ita hotu senti no haree katak durante ukun ne’e, iha fatin fatin povu sei halerik eletrisidade bee moos ai-han infrastructura bazika sira nomós seitor saude no edukasaun sei iha dezafiu barak, partido ne’ebé manan iha eleisaun ida ne’e tenke rezolve problema povu nian” Aniceto konklui.
