Reportajen Joselina dos Santos
Comissão Nacional de Eleições (CNE), hahu halo Apuramentu Nasional iha Loron 24 fulan Maiu 2023, no CNE halo validasun ba Votu reklamadu hamutuk 514 no partidu Kongresu Nasional Rekonstrusaun Timorense (CNRT) hetan tan votus 38, Frente Revolusionariu Timor-Leste Indepedene (FRETILIN) hetan votus 7, Partidu Demokrata (PD) hetan 4 no Kmanek Haburas Unidade Nasional Timoroan (KHUNTO) hetan votu 2.
Liuhosi Konferensia Imprensa, Vise Prezidente CNE, Domingos Barreto, hateten, CNE hala’o nia funsaun, papel no kompeténsia haktuir atribuisaun iha artigu 65, alina h) Konstituisaun Repúblika Demokrátika Timor- Leste (RDTL) no artigu 8, Lei Nú. 5/2006, 28 Dezembru, ho redasaun alterasaun datoluk iha Lei Nú. 16/2021, 28 Jullu, Lei Nú 6/2006, 28 Dezembru, ho alterasaun dahat ba Lei Nú. 9/2017, 5 Maiu, ho konjugasaun iha Dekreto Governo Nu. 21/20172, 10 Fevereiru kona-ba Prosedimentu votasaun kontazen no apuramentu ba rezultadu eleisaun parlamentar.
“Ami hahu halo Apuramentu Nasional iha Loron 24 fulan Maiu 2023, hodi prosede akta Apuramentu Munisipal 13 no RAEOA, akta sentru votasaun hamutuk 1,472 ne’e inklui sentru votasaun 12 iha diáspora, falta akta hosi Reinu Uniduu, Irlanda do Norte no Portugal Votu Reklamadu ne’ebe iha hamutuk 515. Hosi Aileu hamutuk Votu Reklamasaun 8 ne’ebé 4 nafatin sai Nulu, no 4 sai validu atribui ba partidu CNRT. Iha aileu mosu mós deskripansia numerika, maibé konsege detekta, tanba eleitor ne’ebé vota tau fali ba urna laran buletin ezemplu nian mak ba no konsidera nu’udar votu Rejeitadu”, dehan, Vise Prezidente Domingos Barreto Liuhusi Konferensia Imprensa, iha Salaun Media Center CNE Kolmera, konta 25/05.
Nia dehan, hosi Munisipiu Ainaro nian Votu Reklamadiu 5 sai validu 5 no Atribui ba partidu CNRT, Hosi Munisipiu Atauro votu Reklamadu 1 no sai validu atribui ba CNRT, hosi Munisipiu Bobanaro votu Reklamadu iha 43, sai Nulu 6 sai Branco 3 no Validu 34, Atribui ba partidu PD 3, KHUNTO 2, FRETILIN 5 no CNRT 24 Hosi Covlima Votu Reklamadu 9, sai Nulu 2 no validu 7, atribui ba PD 1, FRETILIN 2 no CNRT 4.
Hosi Baucau nian iha mos Deskripansia Numerika, iha Buletin votu tolu mak sai nu’udar votu abandonadu, tanba eleitor ne’ebé vota la tau buletin ne’ebé nia vota ba urna laran. Durante loron dahuluk nian realiza Apuramentu Nasional CNE simu mós Keixa no reklamasaun hamutuk 2 ne’ebé nia indisius ba iha elisitu eleitoral nian.
