Reportajen Silvino Freitas
Komisaun Funsaun Públika (KFP) hasai ona sirkular ba gabinete sira ministeriu hotu atu hapara ona prosesu rekrutamentu ba funsionáriu foun, nune’e mós grupu sira ne’ebé apoiu politiku ba gabinete ministeriu nian atu hamamuk fatin hodi hein tranzisaun governu foun hala’o hikas sira nia servisu.
Komisáriu KFP Faustino Cardoso hateten, dadaun ne’e ita iha perido tranzisaun husi oitavu governo ba iha nonu governo, nune’e husi papél husi KFP maka hasai ona sirkular ida ba iha ministeriu hotu hotu atu hapara ona rekrutamentu no ba tranferénsia husi kazuais ba ajente administrasaun públiku nomós pedidu ba selesaun pur meritu atu ba okupa kargu xefia sira nune’e bele fó biban ba governo foun atu bele iha nia kontinuidade.
“KFP mós hasai ona sirkular espesiál ba sira ne’ebé apoiu politiku ba gabinete membru governu tanba sira ne’e mai husi grupu hirak ida, grupu ida mai husi funsionáriu públiku wainhira mandatu governu remata sira nia mandatu mós remata ona nune’e husu ona ba KFP atu bele reativa sira ba fali sira nia instituisaun orijin servisu, ne’ebé lalika obriga an iha gabinete ne’ebá” dehan Faustino iha parlamentu nasionál, (06/06).
Entretantu tuir Faustino katak, sira ne’ebé apoiu politiku ba gabinete ne’e mandatu kontratasaun mós ramata tuir governu nia mandatu tanba ne’e hotu hotu husik mamuk ona gabinete ne’ebé sira hala’o servisu iha kada ministeriu idak-idak nian, nune’e mós sira ne’ebé durante ne’e hetan lisensa espesiál laiha vensimentu hodi fó apoiu politiku ba gabinete sira nia avaliasaun dezempeñu kontinua la’o, maibé bainhira fila ba idak-idak nia instituisaun sei hala’o servisu tuir orientasaun superior ne’ebé kabe ona.
