Reportajen David da Costa
Partidu Kongresu Nasional Rekonstrusaun Timorense (CNRT) la simu ho Fraude Eleitorál ne’ebé akontese Iha Elisaun Parlametar 2023, tanba ne’e Partidu CNRT hakarak prosesa ba ba ohin nafatin, atu hanorin jerasaun foun no futuru lideransa país ninian atu labele monu tan ba problema sira hanesan ne’e.
Prezidente Partidu Kongresu Nasional Rekonstrusaun Timorense (CNRT) Xanana Gusmão, hateten, Fraude eleitorál ne’ebé CNRT haree, fiskais partidu nian ne’ebé iha STAE no CNE aprejenta ona, no hotu-hotu hatene tiha ona katak Partidu CNRT la simu no CNRT hakarak protesta no tau fraude eleitorál ne’e ba oin la’os atu altera rezultadu, CNRT simu maibé CNRT la simu mak fraude eleitorál ne’e rasik.
“Iha fatin balun ne’ebé deputadu CNRT nian iha ne’eba lá ho tan fiskais, CNRT hetan votus 0, ida ne’e ita sente katak demais. Ami bolu kedas deputada Bendita Magno hodi dehan bee imi la vota, imi absten fali imi nia sentru votasaun maibé deputada sira hatan sira iha ne’ebá no CNRT hetan votus 0, ne’e signifika votu ne’ebé CNRT hetan fó fali ba partidu seluk, ida ne’e mak halo ami la simu,” dehan Prezidente Partidu CNRT, Xanana Gusmão, Bainhira remata hasoru malu ho PR Ramos-Horta iha Palásiu Prezidensial Bairo-Pite, Kuarta 7/06.
Tanba ne’e Kazu fraude eleitorál iha elisaun parlametar tinan 2023 ne’e, partidu CNRT sei lori ba oin ne’e atu bele hanorin jerasaun foun no futuru lideransa país ninian atu labele monu tan ba problema sira hanesan ne’e.
“Ami la reklama ona, ami lakohi, ami hakarak prosesu ne’e la’o nafatin ba oin, ida ne’e ami reklama ne’e atu bele kastiga tiha ema sira ne’ebé halo, hodi hanorin katak iha futuru rai ida ne’ebé hotu-hotu tenke respeita lei, iha demokrásia nia laran, hotu-hotu tenke ezerse ninia direitu labele halo buat hanesan ne’e.CNRT la kontesta rezultadu, ami simu de’it,” nia esplika.
Atu nune’e labele tan akontese hanesan ne’e, tanba sei iha eleisaun suku, sei iha eleisaun ba desentralizasaun, nune’e kurije agora atu labele akontese iha futuru fraude eleitorál tanba ne’e krime.
