Reportajen David da Costa
Prezidente Partidu kongresu Nasional Rekonstrusaun Timorense (CNRT) Xanana Gusmão hateten, ba proporsionalidade ba membru governu dasia nian sei la ko’alia iha ne’e, tanba ohin enkontru ho Prezidente Republika, Dr. José Manuel Ramos-Horta, hanesan enkontru informal ho partidu mais votadu, no depois VI lejislatura mak bolu Primeiru Ministru indijitadu husi partidu maiória parlamentár hodi ko’alia kona-ba proporsionalidade governu dasia nian.
“Kona-ba proporsionalidade ba membru IX governu, ha’u sei la ko’alia iha ne’e, tanba ohin enkontru ho Xefe Estadu hanesan enkontru informal ho partidu mais votadu no depois loron rua ka tolu husi loron lejislatura foun hahú parlamentu foun foin mak Xefe Estadu bolu Primeiru Ministru indijitadu husi partidu maiória parlamentár hodi ko’alia kona-ba proporsionalidade governu dasia nian. Dala ida tan atu hatete katak ohin enkontru ho Xefe Estadu ne’e la ko’alia kona-ba formasaun governu,” dehan Prezidente Partidu CNRT, Xanana Gusmão, Bainhira remata hasoru malu ho PR Ramos-Horta iha Palásiu Prezidensial Bairo-Pite, Kuarta 7/06.
Nia hatutan, tanba ohin ne’e, Prezidente Repúblika konvida enkontru informal, tanba CNRT sai partidu vensedór, ne’ebé CNRT mai husu atu la’o nusa, hotu-hotu hatene ona, Sekretáriu Jerál Partidu CNRT Francisco Kalbuady Lay ba tiha ona Sede Partidu Demokrátiku no ko’alia tiha ona, ne’ebé hotu-hotu hatene ona, CNRT mós informa ba Xefe Estadu partidu rua ne’e sei la’o hamutuk no oras tan PD sei mai hasoru mós Xefe Estadu, maibé enkontru sira ne’e sei informal no formál loloos ne’e depois sesaun dahuluk VI lejislatura.
“Ami husu hela ba Xefe Estadu kona-ba kalendáriu, no horsehik Prezidente Parlamentu, Aniceto Guterres ko’alia ona katak hein to’o loron 15, no sei monu iha loron 22 Juñu no ita hein atu liu tiha ne’e iha loron daruak eleisaun ba Prezidente Parlamentu Nasionál foun, no tuir mai komisaun sira no buat sira selu-seluk tan. Ho ida ne’e mak Xefe Estadu bele bolu formalmente, Primeiru Ministru indijitadu ne’ebé mai husi partidu maiória parlamentu mak indijita,” nia esplika.
Maibé ohin ne’e Xefe Estadu bolu CNRT hanesan partidu mais votadu, la’ós Primeiru Ministru indijitadu. Hafoin eleze tiha PPN, Vise Prezidente no komisaun sira hotu foin mak Xefe Estadu bolu Primeiru Ministru indijitadu formalmente hodi husu dehan formasaun governu oinsá atu bele disksute.
“Rona lia anin katak sesaun lejislatura foun sei akontese iha fulan Setembru mai, atu dehan katak CNRT la aseita ho ida ne’e, maibé tuir previzaun ba rejimentu ne’ebé hatete másimu loron 15 onestamente Konkorda ho ida ne’e, no ami obedese ba regra sira atu labele hamosu difikuldade ba ordem públika ne’ebé iha,” tenik nian.
Nune’e mós Prezidente Partidu CNRT hato’o parabéns ba povu Timor Leste, no liu-liu ba juventude sira ne’ebé hatudu maturidade no hahalok di’ak durante kampaña eleisaun parlamentár la’o di’ak no laiha akontesimentu ruma no halo apelu atu situasaun ne’e kontinua nune’e hodi revela ba maturidade polítika povu ninian.
