Reportajen Agustina Amaral
Sekretáriu Estadu Autoridade Protesaun Sivil (SEAPC) realiza seremónia distribuisaun kareta ba membru Autoridade Protesaun Civil (APC) iha Munisípiu 10 hodi halo operasaun dezastre iha teritóriu Timor-Leste molok determina mandatu.
“Ohin iha atividade ida ne’e atu husi APC distribui ou entrega kareta operasaun hanesan Bomberos, Autoskada, Hilux ba komando APC nasional no Xefe Gabinete, Diretores Nasionais Komando APC munisípiu sira hodi kontrola iha munísipiu 10 liu-liu ba iha hala’o asaun salva vida, hamate ahi han komunidade sira nia uma” dehan Sekretáriu Estadu Autoridade Protesaun Sivil, Joaquim Gusmão Martins ba jornalista iha, Caicoli Dili, Kinta-feira, 08/06.
Tanba ne’e mak ohin Autoridade Protesaun Sivil realiza seremónia distribuisaun kareta operasaun no kareta Bombeiros ba Komando APC Nasional, no Xefe Gabinete, Diretores Nasionais no Komando APC Munisipais sira hodi halao primeiru intervensaun ba asaun salva vida no hamate ahi han komunidade sira nia uma no kareta operasaun nian hodi hala’o aktividades diáriu nian kada loron iha munisípiu 10, nia dehan.
Nia husu ba komando munisípiu no motorista tenki tau atensaun no toma konta ba iha kareta sira ne’e no kareta sira ne’e ita hola ho osan povu no estadu nian no responsabilidade ne’ebé boot hodi kuidadu ekipamentus sira ne’e no ekipamentus sira ne’e ita uza hodi apoiu ba ita nia komunidade sira iha munisípiu ida-idak.
Nia hatete katak, servisu APC ne’e servisu ida ne’ebé mak importante boot tebes no la henesan ho servisu sira seluk no presiza ita nia atensaun maximu ho haree ba situasaun saída mak akontese iha komunidade sira ita bele atende ho di’ak no bele salva sira no ekipamentus no kareta sira ne’e tenki uza halo di-di’ak atu nune’e dezastre saída mak akontese iha ita nia teritóriu ida ne’e bele atende lais no di’ak ba iha komunidade sira hotu iha teritóriu laran ida nee.
Nia dehan, durante nia mandatu iha planu estratéjiku 4 hanesan halo, primeiru mak halo enkuadramentu legal ba lei sira liu-liu atu hari APC, daruak mak atu hasa’e kapasidade staff sira nian iha APC, datoluk mak infrastrutura no ekipamentus ba iha APC, dahaat nian mak koperasaun belateral ho servisu sira ne’ebé mak iha nia mandatu ne’e mak servisu no programa sira mak ne’e no ba oin sei kontinua mai tan sei aumenta di’ak liu tan iha futuru.
Tuir dadus ne’ebé mak entrega, ekipamentus kareta Bomberos, Autoskada, Hilux ba Komando APC Nasional no Xefe Gabinete, Diretores Nasionais no Komando APC Munisipais mak kareta Bomberos 10, Autoskada 1, Hilux 21. Munisípiu 4 ne’ebé la hetan mak Ataúro, Baucau, Covalima no Oecusse.
