Reportajen Silvino Freitas
Grupu feto Haburas Kultúra Sanan-Rai (HAKUSARA) iha suku Beloi Aldeia Arlo, kontinua dezenvolve materiál tein nian, hanesan sanan-rai ne’ebé utiliza husi sira nia beiala sira, nune’e produtu antigu ne’ebé sira prodúz atu atrai vizitante sira hodi sira bele hetan osan balun uza ba nesesidade família nian.
Tuir Xefe Grupu Graciana Dias haktuir, gupu HAKUSARA ne’e nia servisu maka hala’o produsaun ba sanan-rai tanba uluk iha tempu beiala sira nian sira laiha sanan tanba ne’e to’o daudaun ne’e ami sei ka’er nafatin sira kultura nu’udar produtu ne’ebé sira husik hela ba sira, tanba ne’e grupu ne’e sira harii durante tinan 10 ona.
“Ami nia grupu ne’e harii iha tinan 2013 ami prodúz sanan-rai ne’e ami faan hodi bele hetan osan, sustenta ami nia oan sira nia eskola inklui ba ami nia nesesidade lorloron nian” haktuir Graciana iha Arlo Ataúro, (11/07).
Nia dehan tan, osan sira ne’ebé sira hetan liuhusi sanan-rai ne’ebé fa’an sei rai hamutuk nune’e sei fahe ba malu hodi bele haree no uza osan sira ne’e ba sira nia nesesidade família nian, nomós uza ba haree oan sira nia eskola, tanba sanan-rai ne’ebé fa’an tuir nia kualidade ida ki’ik fa’an ba $5 no ida bo’ot fa’an ba $10 ami bele rai hamutuk haree ba osan sira ne’e barak foin bele fahe ba membru sira hodi uza ba sira nia nesesidade nian.
“Fahe osan ne’e konforme ba ema ne’ebé sosa sanan karik ami ema sosa barak mak iha tinan ida ami hetan $300 to’o $200 entaun ami fahe kada ema ida hetan $10 to’o $15” nia dehan.
Graciana konklui katak grupu ne’e harii hetan apoiu husi Sentru Empreza Di’ak nian nune’e bainhira sira prodúz sanan-rai ne’e sira lori ba fa’an iha sentru empreza di’ak no balun fali sira ba fa’an iha merkadu, produtu sira ne’e mós balun hola husi ema estranjéiru ne’ebé vizita Ataúro, folin ne’ebé sira fa’an ne’e hanesan ba vizitante sira husi nasionál no estranjéiru.
