Reportajen Zevonia Vieira
Komandante Jerál Polisia Nasional Timor-Leste, Henrique da Costa no Segundu Komandante Jeral, Komisáriu Pedro Belo, halo enkontru ho Resistência Nacional dos Estudantes de Timor-Leste (RENETIL), hodi husu hanoin sira ne’ebe bele tulun PNTL hodi hala’o serbisu ne’ebe diak liután ba nasaun no sosiedade.
Relasiona ho situasaun violénsia ne’ebe dalaruma akontese iha komunidade nia leet, nune’e ema kontinua hamosu hanoin katak, problema arte martial. Nune’e ba Neon Metin, Komandante Jerál Polisia Nasional Timor-Leste, Henrique da Costa hatán katak bainhira kuandu ema halo diak, ema seluk sempre dehan la diak, no koalia buat la diak deit, ema indivíduu mak halo, maibé tanba ema ninia pasadu involve iha grupu ida, ema prega hotu ema ida nia salah ba organizasaun.
“Iha parte seguransa nian ita prosesa, karik hanesan involvementu, hanesan indivíduu ruma mak ita nota nia mai husi background arte martial ruma, nafatin ita bolu sira nia responsavel atu ita ko’alia hamutuk, diskusaun ne’ebe ita halo mos involve mos parte Komisaun Regulador Arte Martial (KRAM), hodi hare konaba situasaun ida ne’e, maibé emprinsipiu seguransa iha Dili no munisípiu sira seluk kontroladu”, dehan Komandante Jeral Henrique iha sede RENETIL, 13/07.
Entretantu Sekretariu Jeral RENETIL, Joaquim Fonseca ‘Russuo’ hateten bainhira problema ruma mosu no hamosu akuzasaun, no laiha verifikasaun, ne’e ema hahú atua bazeia ba akuzasaun ne’ebe la verifikadu.
“Kada akuzasaun presiza verifika lai, ita hanesan sosiedade krítiku, labele atua lalais bazeia deit ba akuzasaun ne’ebe fundamentu laiha. Grupu ida ne’ebé rejistu legal iha Timor ne’e, hau la fiar no laiha ida mak hanorin ema atu ba halo aat, mais ema lalais liu halo konkluzaun katak sekarik indivíduu ida mak halo buat ruma la los, ne’e ema dehan organizasaun ne’e mak halo la los, labele jeneraliza tenke ko’alia bazea ba faktu, se mak halo”, esplika SekJen RENETIL ba Neon Metin
Iha enkontru ne’e mos PNTL kontinua husu RENETIL hodi serbisu hamutuk ho PNTL, tau matan ba serbisu PNTL nian, no RENETIL kontinua haforsa liután relasaun ne’ebe harii tiha ona ho instituisaun seguransa ne’e, hodi halo serbisu ne’ebe diak liután ba nasaun no sosiedade.
