Reportajen David da Costa
Primeiru Ministru (PM) Kay Rala Xanana Gusmão, ohin hala’o reuniaun semanál ho Prezidente Repúblika, Dr.José Ramos Horta, hodi atualiza atividade IX Governu Konstitusionálnian ba Prezidente Republika José Ramos-Horta.
Hafoin hasoru malu ho Xefe estadu, Primeiru Ministru (PM) Kay Rala Xanana Gusmão hateten, iha semana kotuk governu hala’o ona aprezentasaun Orsamentu Ratifikativu 2023 ba Komité Revizaun Orsamentu (KRO) iha Ministériu Finansa hodi prepara aprezenta ba Parlamentu Nasionál (PN) iha semana ne’e.
“Ha’u informa ba Prezidente Repúblika katak, durante semana ida ami haree Orsamentu Retifikativu, maibé ha’u seidauk bele fó sai montante hira, tanba sei haree didi’ak fali molok lori ba Parlamentu iha semana oin,” informa Xefe Governu ba jornalista sira, hafoin remata enkontru ho Xefe Estadu José Ramos-Hosta, iha Palásiu Prezidensiál, Bairo-Pite, Kinta 3/08.
Nia haktuir, iha semana kotuk, liña ministériu sira inklui instituisaun estadu nian hotu-hotu, ida-idak ba hala’o sira nia aprezentasaun ba Komité Revizaun Orsamentu hodi aprezenta orsamentu no presiza hadi’a mós sistema sira hodi lori governu ezekuta programa no orsamentu ho di’ak.
Alende halo preparasaun ba proposta Orsamentu Ratifikativu, Governu liu hosi Komité Revizaun Orsamentu (KRO) prepara mós Orsamentu Jerál Estadu tinan 2024 nian.
“Ami sukat didiak kbiit atu tau osan ne’e, tanba dala ruma ita husu osan barak maibé ita la ezekuta, nune’e molok iha fim anu 2023 nian ita iha ona orsamentu tinan 2024 nian,” dehan Xanana.
Entretantu Reuniaun Komite Revizaun Orsamentu realija husi Diresaun Jerál Planeamentu no Orsamentu (DJPO), Ministériu Finansas no Sekretariadu Grande Projetu, Ajénsia Dezenvolvimentu Nasionál (ADN), Komisaun Nasionál Aprovizionamentu (CNA), nu’udar Sekretariadu ba KRO Retifikativu 2023 finaliza ona servisu deskusaun Orsamentu Ratifikativu sei aprezenta fali ba Konsellu Ministru, molok lori ba Parlamentu Nasionál.
