Home Meio Ambiente IMS Espera Media no Jornalista Timor Hahú Kobertura Asuntu Ambiente no Mudansa...

IMS Espera Media no Jornalista Timor Hahú Kobertura Asuntu Ambiente no Mudansa Klimátika ho nia Solusaun

438
0
Jornalista Neon Metin halo entrevista ho

Reportajen Adroaldo “Saretukau”

International Media Support (IMS) ho suporta hosi UNESCO organiza Bootcamp iha Cipanas Indonezia ba jornalista no media sira hosi Sudeste Aziátiku konabá “Reportajen Media ba Meiu Ambiente no Mudansa Klimátka.”

IMS nia Senior Strategic Adviser, Henrik Grunnet hatete, “motivu hosi Bootcamp ida ne’e atu oferese ferramenta (tools) sira atu halo reportajen di’ak konabá ambiente no mudansa klimátika. Ita presiza media atu halo kobertura diferente tanba ita seidauk konsiente katak saida mak ema sira bele halo ohin loron no oinsá situasaun ne’e nia grave.”

Nia hatete, rajaun konvida jornalista hosi Timor-Leste ba Bootcamp ida ne’e, tanba nia lee ona Timor-Leste nia situasaun balun hosi publikasaun Nasoens Unidas no situasaun ida ne’e grave tebes duke nasaun sira seluk konaba ambiente no mudansa klimátika, no barak mak lahatene ida ne’e, tanba ne’e mak nia interesadu tebes ajuda jornalista hosi Timor.”

“Ha’u espera katak imi fila ba Timor-Leste no hahú koberutra, la’os de’it ba buat ne’ebé ladi’ak maibé kobertura mos oinsá mak ema bele halo, oinsá proteje sira nia aan, oinsá mak ajuda atu hetan bee, ka oinsá mak sira bele evita inundasaun, hahú hakerek konaba ida ne’e, halo oinsá mak bele haree ida ne’e, halo oinsá mak ema arkiva saida mak sira grava iha sira nia telefone, bele uza ida ne’e no hato’o ba polítiku na’in sira, atu ajuda halo asaun ruma, informa, hakerek notísia atu polítiku na’in sira buka solusaun.” Dehan Henrik iha Novus Giri Resort iha Cipanas.

Henrik hatete, iha futuru IMS bele servisu hodi tulun jornalista iha Timor-Leste hodi oferese trainamentu oinsá halo kobertura isu mudansa klimátika no ambiente nomos servisu hamutuk ho redasaun media sira.

“Ita bele halo ho dalan balu, primeiru ha’u hakarak karik ita bele treina treinador balu hodi treina hikas jornalista sira ka bele ami treina trainador sira. Hanesan agora iha ne’e, ami hakarak lori jornalista sira hamutuk iha rejiaun ne’e, hodi hetan mos inspirasaun, fo ba sira inspirasaun no ita bele hala’o online, se posível hodi treina, maibé di’ak liu mak to’o iha ne’eba no servisu ho redasaun media sira.”

Partisipante Timor-Leste, Jestor Radiu Atoni Lifau, Jose Francisco Efi, hato’o nia sentimentu kontente partisipa iha treinamentu ida ne’e. “Ha’u sente kontente, tanba ha’u bele aprende buat foun, liu-liu oinsá atu halo koberutura ba mudansa klimátikano issu ambiente. Alein de ne’e, ha’u bele hasouru malu ho kolega jornalista sira hosi nasaun Sudeste Aziátiku.”

“Vantajen hosi Bootcamp iha Bogor mak oinsá radiu komunidade sira, liu-liu ha’u nia estasaun radiu bele halo kampaña iha komunidade atu hadomi no kuidadu meiu ambiente hanesan uza to’os modernu duke sistema tradisional iha RAEOA (Rejiaun Administrativu Espesial Oekusi Ambeno).” Nia dehan ba Neon Metin.

Nia sei foka liu ba sosial media no media konvensional hanesan radiu hodi halo kampaña konaba ambiente hodi minimiza sistema tradisional ba to’os na’in sira iha rejiaun Oekusi.

Bootcamp ne’e partisipa hosi media Indonézia, CNN Indonesia, Suara, Narasi TV, Magdalene, Tempo, media Malaysia nian, Macaranga, Media Tailándia, Today, meida Filipina mak GMA News Digital, FYT, Minda News, Puma Podcast, no hosi Timor mak Neon Metin, Radiu Lorico no Timor Post. Bootcamp hahú iha loron 7 to’o 12 Agostu 2023 in Cipanas, Cianjur, Java Oeste, Indonézia.

Print Friendly, PDF & Email

LEAVE A REPLY

Please enter your comment!
Please enter your name here