Home Notisia La’o Hamutuk Preokupa Ho Komitmentu Governu Kona ba Transparénsia, Akuntabilidade no Partisipasaun...

La’o Hamutuk Preokupa Ho Komitmentu Governu Kona ba Transparénsia, Akuntabilidade no Partisipasaun Públiku

690
0
Grafik La'o Hamutuk nian konaba OJE Retifikativu 2023. [Foto: Doc.La'o Hamutuk | 18.08.2023]

Reportajen Zevonia Vieira

La’o Hamutuk hetan biban husi Komisaun C, Parlamentu Nasionál atu submete pareser kona ba sira nia perspetiva iha Orsamentu Estadu 2023 Retifikativu no intensaun ba mudansa iha Lei Enkuadramentu Orsamentál no Jestaun Finanseira No.2/2022 no Lei Tributária No.8/2008.

Maske nune’e, La’o Hamutuk hanoin katak, diskusaun importante hirak ne’e presiza atu loke oportunidade ba públiku atu hato’o direta sira nia hanoin ne’ebé bele ajuda iha prosesu diskusaun hodi tetu ho prudente liu no kuidadu antes halo desizaun.

Liuhusi komunikadu  imprensa ne’ebe Neon Metin asesu , iha loron 18 Augustu tuir La’o Hamutuk katak iha proposta Orsamentu Retifikativu 2023 mak úniku liu, tanba governu konsege halo redusaun 13% ka biliaun $1.81 kompara ho OJE orijinál ba 2023 total $2,106 biliaun, maibé, redusaun ida ne’e nafatin hatudu dúvida boot ba kapasidade ezekusaun ba tempu badak, tanba ezekusaun atuál foin atinje de’it 32% iha 2023, tanba tuir kriteria no Lei Orsamentu Estadu presiza ezekuta hotu iha tinan ikus Dezembru nian 100%

La’o Hamutuk hakarak hato’o apresiasaun ba inisiativa balu ne’ebé Governu propoin atu halo alterasaun ba Lei Enkuadramentu Orsamentál no Jestaun Finanseira No. 2/2022 no Lei Tributária No.8/2008. Mezmu nune’e, oportunidade ne’ebé Parlamentu iha, la nato’on atu deskute ho klean ba alterasaun Lei importante sira ne’e.

Transparensia, Akuntabilidade no Partisipasaun?

Aleinde ne’e, La’o Hamutuk mós preokupa kona ba komitmentu husi Governu Da-IX kona ba Transparénsia, Akuntabilidade no Partisipasaun Públiku. Tanba Iha Lei enkuadramentu orsamentál atuál, permite oportunidade partisipasaun públiku inklui média no Sosiedade sivíl atu oferese kontribuisaun analítiku, durante diskusaun sira iha Jornada Planeamentu ba Opsaun Prinsipál – Lei Grande Opsaun, maibé proposta ba alterasaun ida ne’e, sei hamenus liu tan oportunidade atu Governante no distintu deputadu/a sira hetan perspetiva diferente antes deside proposta Polítiku sira.

Hanesan sosiedade sivil, La’o Hamutuk katak Parlamentu Nasionál labele kontinua prosesu sira iha pasadu ne’ebé limita partisipasaun públiku. Mezmu mudansa ba Lei sira ne’e importante, maibé La’o Hamutuk husu atu la mai ho karákter urjénsia atu diskute ho kle’an no detallu.

Iha proposta alterasaun ba Lei sira nota katak iha melloramentu balu, hanesan iha Artigu 68 ne’ebé reforsa tan Kontrolu ne’ebé rigorozu liu no hatún esepsaun ba sistema duodesimal, ne’ebé dau-daun ne’e inklui mós transferénsia husi Fundu Petrolíferu no Artigu 95 kona ba rekerimentu ba informasaun espesífiku liu ho proposta OJE Retifikativu, no ida ne’e konsidera di’ak tebes no presiza mantén no seluk ne’ebé hatuur obrigasaun atu husi parte Governu fornese informasaun espesífiku.

Maske nune’e, iha mós preukupasaun seluk husi La’o Hamutuk ne’ebé hanoin katak kuaze priór mak hanesan Artigu 47 kona ba elimina Lei GOP (no aumenta informasaun kona-ba Planu Investimentu Estratéjiku Anuál ho Orsamentu iha Outubru). Ida ne’e taka oportunidade ba diskusaun iha públiku no Parlamentu Nasional kona-ba prioridade no programa sira, ne’ebé bele ajuda Governu atu prepara proposta OJE no artigu rua seluk ne’ebé kuaze la realístiku ba tempu.

Reseita ba Orsamentu Retifikativu ida ne’e, ilustra dala ida tan dominasaun fundu petrolíferu iha Orsamentu Estadu kada tinan too agora, ne’ebé hatudu nasaun Timor-Leste besik tama ona ba rai-naruk fiskal.

La’o Hamutuk hanoin katak Governu tenke kuidadu liu propoin sira nia programa atu la nafatin kontinua ba programa hirak ne’ebé too ohin loron seidauk iha klareza kona ba benefísiu realístiku liu ba povu, hanesan projetu Tasi Mane ho nia komponente tomak. Ami sujere atu haree no re-avalia fali ba infrastrutura hirak ne’ebé harii ona hanesan Auto-estrada, aeroportu no seluk tan.

Balansu atuál Fundu Petrolíferu biliaun $18, tenke sai oportunidade atu harii polítika no sistema ekonomia ida diversifikadu, renovavel no sustentável ba atinje interese tempu naruk Povu Timor nian.

Jerálmente La’o Hamutuk apresia prinsípiu tributaria kona-ba sira ne’ebé iha rendimentu boot liu tenke kontribui barak liu. Realidade, taxa seletivu ne’ebé uluk aplika ona, ladún iha implikasaun ba Povu ki’ik maibé Governu esforsu atu rekolla reseita husi ema ho kbiit ekonómiku boot.

Nune’e La’o Hamutuk hanoin katak, liu husi alterasaun Lei Tributaria ne’e la implika ba povu vulneravel inklui mós estadu iha prosesu rekolla reseita no sujere atu Parlamentu Nasionál orienta Banku Central Timor-Leste – BCTL hodi halo polítika monetaria no mós Ministériu Finansa hodi aplika ona Impostu Valór Akresentadu – IVA/VAT ba produtu sira ne’ebé la tama ba kategoria nesesidade bázika. Iha tempu hanesan, Governu tenke sériu iha investimentu doméstiku ba setór agrikultura hodi subtitui dependénsia ba produtu importadu.  

La’o Hamutuk apresia ba Governu ne’ebé hamenus montante despeza husi empréstimu husi tokon $74 ba tokon $35 iha tinan 2023. Espera Governu konsidera situasaun ekonómiku no realidade kona ba rezerva mina no gas iha Bayu-Undan ne’ebé sei remata iha tinan 2023, indika ona katak estadu presiza evita no iha konsisténsia atu redús fó todan ba futuru tuir mai liu husi emprestímu. Nune’e ita labele kontinua atu tetu Timor-Leste nia kapasidade atu selu fali deve bazeia ba PIB no reseita ohin loron nian, tanba bainhira Fundu Petrolíferu mamuk, sasukat ne’ebé governu no ajénsia internasionál uza atu hatene risku husi deve sira sei la relevante.

Ami espera Governu kontinua hamenus no halakon empréstimu ba projetu sira ne’ebé uza osan públiku no la fó implikasaun direta ba povu hodi sakrifika fali setór esensiál.

Nune’e Lao Hamutuk rekomenda ba governu presiza fahe informasaun no labele limita partisipasaun públiku atu partisipa iha diskusaun proposta retifikativu OJE 2023 ida ne’e. Nune’e, ami rekomenda atu Parlamentu Nasionál ezije ba Governu hodi mantén transparénsia – disponibilidade informasaun iha sistema online atu enkoraja partisipasaun ativu sidadaun sira nian.

Governu presiza fornese provizaun estimativa ba kada proposta OJE hodi PN no públiku bele konsidera no avalia proposta alokasaun bazeia ba kustu tomak ba kapitál, operasaun no manutensaun sira.

La’o Hamutuk husu ba Deputadu/a sira atu ezije Governu atu la bele ignora situasaun grave rai naruk fiskál, no foti asaun apropriadu liu husi investimentu ba setór agrikultura, manufatura no turismu hodi asegura katak nasaun ne’e iha duni alternativu no kore duni nia dependensia ba FP.

No Parlamentu Nasionál presiza hadi’ak prosesu audiénsia “públiku” ka mekanizmu seluk atu simu informasaun no analiza husi sosiedade sivíl no povu.

Print Friendly, PDF & Email

LEAVE A REPLY

Please enter your comment!
Please enter your name here