Reportajen Silvino Freitas
Asosiasaun Dalan ba Naroman (ADBN) fasilita ekipamentus pineira rai-henek ba família pineiros iha mota Komoro, ne’ebé hetan finanseiru husi Servisu Apoiu Sosiedade Sivil no Auditoria Sosiál (SASCAS).
Tuir Diretór Executivu ADBN Noel Pinto katak, ekipamentu sira ne’e nu’udar parte ida atu apoiu no proteje komunidade sira nia servisu hanesan pineira rai-henek iha mota Komoro, nune’e ekipamentu sira maka hanesan gerobak, aisuak, kanuru, rede no seluk tan, tanba durante sira hala’o servisu pineira rai-henek sira hasoru difikuldade maka ekipamentu sira ne’e no durante ne’e sira ejiji ba parte relevante maibé la hetan apoiu.
“Sira presiza duni ekipamentu sira ne’e maka durante ne’e ADBN nia monitorizasaun no observasaun katak komunidade pineiru sira presiza hetan tulun, nune’e ADBN parseiru ho SASCAS ne’ebé apoiu osan uituan hodi hola netik sasan sira ne’e hodi apoiu sira” dehan Diretór ADBN iha ponte foun Komoro, (05/10).
Nia dehan tan katak, dadaun fahe uluk ba nain 10 no sei fahe to’o 40, nune’e iha faze primeiru hala’o tiha ona iha ponte CPLP iha tinan kotuk no tinan ida ne’e maka faze segundu atu sira bele senti katak ADBN nafatin iha komitmentu atu apoiu sira nia atividade pineira rai-henek hodi buka osan, nune’e totál husi orsamentu ne’e maka apoiu husi SASCAS iha tinan kotuk ho montante $15,000 foin lalais iha orsamentu retifikativu apoiu tan $10,000 ho ninia ezekusaun 40%.
Fatin hanesan Diretór Executivu SASCAS Edvin Noronha dehan, komunidade pineirus sira nu’udar badaen bo’ot ho sira nia liman rasik hodi ema bele hetan fasilidade hanesan uma di’ak estrada di’ak no seluk tan, maibé sira mós hasoru difikuldade ne’ebé seriu tebes no presiza atensaun husi governu, tanba governu iha nia obrigasaun tomak atu tau matan ba nia sosiedade hotu.
“Karik iha futuru maka imi hetan difikuldade bele ko’alia ho ADBN tanba sira maka iha mandatu ida atu ko’alia kona-ba ita bo’ot sira nia direitu no obrigasaun balun” dehan Diretór Edvin Noronha iha ponte foun Komoro nian.
Diretór ne’e konsidera, komunidade pineirus iha mota Komoro ninia kontribuisaun ba dezenvolvimento ne’e boot tebes tanba uma di’ak estrada di’ak ne’e kontribuisaun mai husi rai-henek ne’ebé sira pineira, nune’e komunidade pineirus tenke ko’alia ho ADBN atu bele hetan fasilidade ne’ebé di’ak liu nomós rona sira atu bele kuida fasilidade públiku sira ne’ebé besik iha sira nia sorin hanesan ponte hun no murulla ne’ebé satan ameasa bee nian.
