Reportajen Silvino Freitas
Asosiasaun Jornalista Timor Leste (AJTL) kolabora ho Fundu Populasaun Nasoens Unidas (UNFPA) atu kapasita jornalista sira hodi hasae konesimentu ba kobertura ne’ebé kredivel bá informasaun saúde feto, joven, violénsia bazeia ba jéneru, tanba dadaun iha informasaun falsu barak kontinua espalla nomós sosiedade la duun asesu ba informasaun ho loloos.
Country representative UNFPA iha Timor Leste Arifin Cabo dehan, kooperasaun ne’ebé ajénsia UN hala’o ho AJTL ne’e parte importante tebes tanba atu halo dizeminasaun informasaun kona-ba issu juventude saude mortalidade nian nomós issu importante ne’ebé dadaun ne’e akontese, hirak ne’e presiza tebes partisipasaun jornalista no média sira nian atu bele koopera hodi fó sai informasaun ne’ebé kredivel liu ba sosiedade.
“Kooperasaun ho AJTL ne’e importante tebes iha momentu krusiál informasaun falsu espalla barak tebes iha komunidade tanba informasaun ne’ebé atu fó sai iha komunidade presiza kredivel no presiza suporta ho faktus no evidensia atu ema bele hatene, karik fó sai informasaun kona-ba HIV tenke iha faktus ba númeru sira ne’ebé iha no mós ba maternidade inan ninian karik ne’ebé as tebes tenke ho dadus” dehan Arifin iha salaun Kofi-Anan Kaikoli,(13/10).
Arifin konsidera katak, informasaun ne’ebé kredivel ne’e importante tebes atu bele salva ema nia vida nune’e mós informasaun sira ne’ebé ema espalla husi fali ema ba ema liuhusi viziñu sira no mós merkadu sira, tanba ne’e presiza informasaun husi média ho kredivel sai hanesan fontes ne’ebé importante atu ema bele fiar hodi foti desizaun ba sira nia moris nune’e bele salva vida.
Fatin hanesan Prezidente AJTL, Zevonia Vieira esplika, kolaborasaun AJTL ho UNFPA ne’e foin ba dalauluk atu foka bá saúde feto, violénsia bazeia ba jéneru, hala’o kobertura nu’udar advokásia ida hodi muda ema nia hahalok nune’e bele mós infuluénsia ukun-nain sira nia desizaun hodi bele halo protesaun di’ak liu bá vulnerable sira.
“Husi kolaborasaun atu hasa’e konesimentu jornalista nian ba issu saúde sira tanba kobertura saúde sei menus nune’e presiza hasa’e konesimentu kobertura saúde bá feto sira, tanba ne’e presiza kolaborasaun husi jornalista sira oinsá mak atu halo advokásia ba asuntu refere” dehan Zevonia.
Nia fundamenta tan katak, husi kolaborasaun ne’e mós atu informasaun ne’ebé loloos hodi kombate informasaun falsu hodi la fó vantajen ba grupu vulnerable sira atu sira bele asesu informasaun di’ak hodi prevene an no mós bele prevene an tanba asuntu hirak ne’e parte ida husi direitu umanu nian, kooperasaun ne’e jornalista sira bele hala’o servisu ho di’ak kumpri kode étika no prinsípiu jornalizmu nian nune’e mós bele fó espasu bá feto sira atu bele fó sai sira nia lian bá problema ne’ebé sira infrenta asuntu saúde no violénsia bazeia ba jéneru hasoru labarik feto no mane.
