Home Notisia Presija Broker ba Urus Dokumentu Kompania no Taxa iha SERVE?

Presija Broker ba Urus Dokumentu Kompania no Taxa iha SERVE?

499
0
ho Diretur Esekutivo SERVE, I.P, Florencio Sanches. [Foto: Copyrigt page SERVE | 13.02.2020]

Reportazen Francisco JDA & Zevonia Vieira 

Kompania hotu-hotu iha dever atu selu imposto tuir lukru mak sira hetan. Imposto tenke selu diretamente ba governo. Maibe experiensia hatudu katak prosesu selu imposto bele mos halo liu hosi kompania seluk, ka broker. Kompania ida ne’ebe lakohi temi nia naran hato’o ba neonmetin.info sira nia experiensia, no kompania ne’e sente katak ne’e laos buat babain.

Neon Metin mos hetan informasuan hosi fontes kredibel balun, ne’ebe mak hato’o problema hanesan bainhira ba rejistu kompania iha SERVE, tanba agency balun ka babain ema bolu broker tenta atu prosesa dokumentu kompania nain sira, no husu osan ne’ebe mak la tuir dalan legal.

Neon Metin kolekta informasaun konaba komunikasaun via telefone ne’ebe mak kompania Ophi Metta, Unip. Lda, halo ba kompania balun via telefone. Kompania ne’e informa kona ba servisu ne’ebe sira halo hosi ajuda kompania seluk. Ajuda ne’e bazeia ba konkordansia. Durante ne’e sira ajuda kompania lokal no internasional balun, bainhira atu rejistu iha SERVE.

“Ami fo apoiu adminsitrativu hodi prosesa dokumentu kompania nian no mos dividas pesoal kompania nian, servisu ida ne’e mak durante ne’e ami halo”, hateten Gaby, liu telefone ba Neon Metin.

Atu selu taxa ka imposto liu hosi kompania Ophi Metta Unip. Lda? ba Neon Metin Gaby hateten, “konaba taxa ka imposto ne’e konforme kompania, se sira hakarak husu ajuda liu hosi ami ba selu, ami prontu ajuda ba selu iha banku”.

Durante iha entrevista, fontes refere la konsege responde hotu perguntas ne’ebe jornalista husu, no to’o ikus kompania hakotu deit dadalia liu hosi telefone.

Neon Metin entrevista ho Diretur Esekutivo SERVE, I.P,  Florencio Sanches, hodi halo klarifikasaun, ba Neon Metin, Florencio informa katak, kompanha sira ne’ebe selu imposto ne’e so ba iha Minsterio Financas, halo renovasaun mos selu direitamentu ba banku no SERVE nungka simu osan cash.

“Kompania sira selu imposto direitamente iha banku, no hodi resibu ba iha SERVE hafoin sira foti dokumentus. Sira hotu selu imposto la hanesan, bazeia ba sira nia lukru, hafoin selu 10% ba estadu no prosesu emolomentu no selu imposto la hanesan.  Serve  nunka simu cash ne’e la bele, tanba se ema ruma mak simu bele rekomenda ba serve, nune’e investiga”, Direitor Florencio hafoin tuir seminario iha MSSI 30/01.

Direitor ne’e mos reforsa liu tan iha prosesu rua ne’ebe importante mak emolomentu ne’e selu ba SERVE.IP, maibe liu hosi banku BNCTL so SERVE simu resibo laos simu osan. Se kompania ho kompania entre sira, maibe la bele selu fali ba iha SERVE tanba SERVE nunka simu osan so haruka pagamentu no halo tuir direitamente ba iha banku.

“Emolomentu ne’e selu ba serve liu hosi diploma ministerial, selu ba fotokopia, selu ba legalizasaun dokumentu no selu renova sira nia lisenca ne’e los, maibe la bele selu cash direitamente ba SERVE.  SERVE hasai resibo sira lori selu iha BNCTL fila mai ho resibo hafoin selu dokumentu ida ne’e emolumentu, imposto la bele selu mai SERVE tanba Lei la fo dalan, so autoridade tributaria mak halo ida ne’e”, tenik Direitor.

Nia realsa wainhira kompania no kompania selu osan ba malu, diak liu resolve sira nia imposto ne’e ba iha autoridade tributaria no laos kompetensia SERVE nian. Kompania ho kompania bele iha konkordansia selu osan ba malu, maibe la bele selu osan ba iha SERVE, tanba tuir Lei Registo ho Comercial  gratuita.

Neon Metin halo tan verifikasaun ho SERVE konaba kompania Ophi Metha.Lda atu hare kompania refere registu iha SERVE ka lae? ajuda SERVE hodi apoio servisu administrativu, hodi poiu kompania lokal no internsional sira atu proses dokumentu?

Bainhira crosh check ho SERVE kompania Ophi Metha.Lda laiha relasaun ho SERVE no nia laos iha SERVE nia okos, para prosesa dokumentus SERVE nian. Kompania Ophi Meta mos registu iha SERVE nudar kompania iha lroon 13 Abril 2017 no iha loron 19 Abril 2017.

Servisu de Registo e Verificasaun Empresarial, Institutu Publiku SERVE, I.P, kria bazeia ba Dekretu Lei no 35/2012, ho servisu uniku hodi rejistu lisensiamentu comercial no mos reponsabiliza rejisto empresaria, tuir Planu Estratejiku Desenvolvimentu Governu nian.

 

 

 

 

LEAVE A REPLY

Please enter your comment!
Please enter your name here