Home Feature Produs Sasan Ne’ebe Uluk Beala Sira Uza Hodi Hatutan Moris, COVID-19 Mosu...

Produs Sasan Ne’ebe Uluk Beala Sira Uza Hodi Hatutan Moris, COVID-19 Mosu Moris Sai Nakukun

163
0
Isac da Costa hosi Atauro produs hela sasan sira hosi ai. [Foto: Bernarda da Costa | 08.09.2020]

Reportazen Bernarda da Costa

“Hau triste tebes wainhira sasan ne’ebe hau produz ema atu hola laiha, tamba dala barak ema ne’ebe hola sasan barak liu ema malae sira, maibe  iha situasaun COVID -19 nia laran, halo malae sira fila hotu ba sira nia rain”, Isac da Costa

Inisiativa, badinas, komitmentu ho talentu ne’ebe iha, mak sei hamosu rezultadu iha ita nia moris, ne’ebe la depende ba ema ida hodi buka moris. Hosi Atauro ho ne’ebe konnesidu ho artejenatu hosi ai, halo Atauro nia naran sai morin.

Isac da Costa Atauro ana (oan) ne’ebe mak esforsu nia an, hodi kria serbisu ba nia an rasik, liu hosi produs ai sai estatua, lafaek, bukan, kanoru, garfu, kanedok, kaneka, buli no seluk-seluktan.

Kreatividade ne’ebe mak Isac halo, la fasil bainhira atu hahu aprende, maibe komitmentu no inisiaitiva ne’ebe iha, Atauro ana ne’e konsege hatudu rezultadu ne’ebe atria ema barak nia matan hodi hakbesik ba nia

Neon Metin dadalia ho Isac iha nia serbisu fatin, Isac haktuir katak bainhira sei idade 12, Isac hahu aprende uluk ona, oinsa produs ai sai estatua, lafaek no topeng, hosi ne’eba nia hatutuan to’o ohin loron.

Hosi papa Isac aprende produs artejenatu, nune’e bele tulun nia papa hodi hakmaan moris uma laran nian.

“Iha tinan 1998 hau hahu peska iha Dili no fa’an kedas estatua, lafaek no topeng sira no wainhira iha tinan 1999 mosu krize, hau fila fali ba Atauro. Iha 2022 hahu fa’an fila fali iha Dili, liu tiha ida ne’e ema barak komesa aprende no halo ona estatua, entaun hau ho hanoin ida hakarak atu halo fali buat foun no iha 2007 hau halo fali bikan, kanuru, bandeza, kaneka no seluktan. Sasan ne’ebe mak uluk ita nia beiala sira uza, atu nune’e ita nia identidade labele lakon”, Isac konta wainhira ekipa Neon Metin dada lia hela ho nia iha nia hela fatin Bidau 01/09.

Ai-teka ne’ebe Isac uza hodi produs sasan sira, ho presu $350,00, nia hola iha Ermera, ho aluga kareta selu $25,00 hodi tula ai-teka ne’e mai Dili.

“Hau iha vontade tebes halo servisu ne’e loron –loron no kontente tamba bele promove fila fali sasan ne’ebe uluk ita nia avo sira utiliza”, dehan Isac.

Antes pandemia COVID-19 ne’ebe afeta, Isac hetan rendimentu loron ida bele to’o $300.00 maibe iha propagasaun COVID-19 no hahu tama Timor iha fulan Maiu no akontese estadu emerjensia, serbisu hotu paradu no laiha kedas rendimentu tanba ema la hola.

“Hau triste tebes wainhira sasan ne’ebe hau produz ema atu hola laiha, tamba dala barak ema ne’ebe hola sasan barak liu ema malae sira, maibe  iha situasaun COVID -19 nia laran, halo malae sira fila hotu ba sira nia rain”, tenik Isac.

Sasan sira ne’ebe nia produs tenke lalin hodi ba fa’an iha restaurante ka hotel sira ne’ebe mak iha  malae barak, maibe ho tempu COVID-19, halo Isak lalin sasan ba mai maibe lahetan rendimentu.

Isak ho nia familia hela iha Dili maibe laos uma rasik, sira hela iha kos ka aluga uma, kada fulan Isak selu $100.00, maibe ho situasaun agora, Isac tenke hasoru problema tanba todan atu selu kos

Produtu sira ne’ebe Isac faan ho pakote ida folin $10.00, kaneka kiik $5.00, kaneka boot $10.00, mangko boot folin $50.00, mangko kiik $25.00, kanedok $2.50, lafaek kiik $5.00 no boot ba leten $25.00

Isac nia komitmentu hodi hatutan moris la namlaek maske tenke hasoru dezafius tanba pandemia COVID-19, ne’ebe fo impaktu dezenvolvimentu ekonomia. La fasil ba Isac hodi kompleta nesesidade uma laran nian. Isac ho sira seluktan ne’ebe fila liman, hikis kosar ba moris diak ho esperansa boot virus Corona ne’e bele lakon lalais, atu sira bele hetan rendimentu ne’ebe diak.

Moris simplis ho talent ne’ebe iha, Isac hatoo hela lia menon ba nia maluk joven sira, atu la baruk dezenvolve an, nune bele hetan osan hosi ita nia koleng rasik no labele tane liman ba ema seluk, bainhira sente katak iha kbiit hodi serbi an rasik.

LEAVE A REPLY

Please enter your comment!
Please enter your name here