Home Notisia Komunidade Balibo Nafatin Preokupa Ho Folin Foos Ne’ebé Sa’e

Komunidade Balibo Nafatin Preokupa Ho Folin Foos Ne’ebé Sa’e

4254
0
Komunidade Balibo nia lian. [Foto: Filomena | 19.10.2023]

Reportajen Filomena da Conceição

Komunidade  Postu Administrativu Balibo vila, Munisipiu Bobonaro nafatin perkupa ho foos folin ne’ebé maka kontinua sa’e maskaas iha Postu Balibo Vila no komunidade mós sei dauk hetan foos Rai ne’ebé antes ne’e governu lansa $12,00.

Komunidade Balibo Vila, Maria dos Reis, hateten, sira preokupa ho programa governu ne’ebé deside atu hatun folin foos maibé agora  folin foos kontinua sa’e, tanba ne’e sira laiha kbiit hodi hola foos iha saku, tanba ne’e sira pasiensia  sosa foos ne’ebé sukat iha lata.

“Banhira ha’u labele sosa saku,  ha’u sukat iha  lata tanba kbiit la to’o, atu sosa saku tomak” deha, Maria dos Reis ba jornalista Neometin, iha Balibo Vila, Segunda16/10.

Nia haktuir, sente kontente ho  ukun ida ne’e, maibé iha parte seluk sente triste  tanba ukun nain sira  la hare’e  ba povu nia terus  ho foos ne’ebé folin la tun, nune’e nia preokupa tanba moris nu’udar  to’os nain no oan sira mós  eskola, susar  atu sosa foos ho folin ne’ebé karun.

“Bo’ot sira haruka ami dehan povu sira  vota, depois ami vota, maibé to’o agora halo povu sira kontinua terus hanesan ne’e. Ami oan eskola tan ami lori saida mak hodi suporta oan sira, no lori saida mak sosa foos, tanba ne’e mak ami husu ba boot sira atu bele reduz folin foos,”dehan Maria.

Iha fatin hanesan komunidade Manuel Soares, hatuir, informasaun ne’ebé sira asesu katak governu fó subsidiu ba emprgador sira dehan atu  hatun folin foos maibé to’o agora komunidade Balibo seidauk hetan nafatin foos hirak ne’e.

“Folin foos ne’ebé seidauk tun nafatin fó impaktu bo’ot mai ami tanba governu ko’alia de’it katak governu atu fó subsidiu ba importador sira, maibé lahatene to’o agora iha ne’ebé, mak  iha baze foos nia folin too agora seidauk tun”, dehan Manuel Soares

Nia hatutan, nu’udar komunidade sente preokupa tebes ho folin ida, ne’e tanba governu ko’alia hodi rezolve problema folin foos, maibé realidade iha baze sei nafatin sa’e, ida ne’e hanesan impaktu bo’ot ba komunidade sira tanba atu sosa mos sira iis la to’o tanba menus rendimentu.

“Durante ha’u rasik rona husi Televisão katak iha autoridade Munisipiu sira husi CLN sei  mai to’o iha ne’e dehan katak komunidade sira labele prokupa ho folin foos tanba ami sei ba iha kada suku hodi faan foos ho folin $12 dolar maibé realidade to’o agora ami só haree husi televisaun deit maibé ninia implementasiaun ami seidauk haree”, Nia esplika.

Nia rekomenda ba governu relasiona ho foos ne’ebé atu distribui ba komunidade dadun ne’e to’o ona iha ne’ebé, karik bele implementa mós iha Posto Balibo para komunidade bele haree.

Iha fatin hanesan nain ba loja Welaun  Casmiro da Silva hateten, foos ne’ebé dadaun ne’e sira  faan iha sira nia loja natin ho folin $18,50 cenntavus ba foos  25kg, no 20kg ho folin $14,50 cenntavus.

“Foos ne’ebé ami faan iha ne’e ami hola iha Dili, no iha ne’ebá ami foti 25kg ne’e $17,50 centavos entaun ami mai faan fali iha ne’e ami sura ho kareta mai husi ne’ebá ami sura saku ida ami manan  $1 dolar, ami faan fali ba $18,50 centavos, no 20Kg nia kona $13,50 centavos ami faan iha ne’e ho folin $14,50 centavos,” Esplika Casmiro

Nia akresenta, Ami nafatin faan tuir estandar ne’ebé iha, no kona-ba ba subsidiu nian,  seidauk hetan, maské rona infomasaun barak maibé  ba iha Dili foos ho folin ne’ebé nafatin, tanba ne’e  kontinua faan tuir folin  ne’ebé  sosa iha Díli, maibé só buka de’it mina nian oituan no iha loja ne’e la hasae folin foos.

Print Friendly, PDF & Email

LEAVE A REPLY

Please enter your comment!
Please enter your name here