Home Notisia Kuaze Kafe Hektar 85 iha Ura-hou Hetan Sunu, Komunidade Nia Vida Ekonomia...

Kuaze Kafe Hektar 85 iha Ura-hou Hetan Sunu, Komunidade Nia Vida Ekonomia Ameasadu

288
0
cafe Ermera. [Copyright STL]

Komunidade Ura-hou nia atividade buka moris domina liu ho atividade kafe. Iha fulan Outubru 2019, kuaze kafe hektar 85 mak hetan sunu. Sira triste ho insendiu mak akontese ona no presija tempu naruk hodi rekupera fali saida mak sira lakon.

Xefe Suku Ura-hou, Alberto Soares, hatete ba jornalista neonmetin.info kona ba situasaun moris ekonomia ne’ebe komunidade hasoru depois de insendio.

“Bainhira akontese ahi han rai ami nia kafe sira ahi han hotu. Ami nia kafe kuaze hektar 85 mak ahi han. Ida ne’e fo impaktu tebes ba ami nia moris,”Alberto esplika, iha dalan ba klinika Urahou, 18/01.

Moris defisil ida ne’e komunidade hasoru dadaun. Sira balun lakon sasan hotu-hotu. Maski sira triste sira sei hatete dehan pasiensia.

Vitima insendiu ida, Jacinto Marcal Soares, expresa nia sientementu ba neonmetin.info ho laran triste.

“Hau nian ahi han tomak, hau lakon hau nia sasan barak mai pasiensia tanba ida ne’e akontese ona,” Jacinto hatete.

Jacinto ho vitima insendiu sira seluk hetan ona tulun hodi hadiak sira nia uma mak ahi han maibe sira nia plantasaun kafe sei lori tempu mak bele rekupera fali.

Oras ne’e dadaun sira buka moris ho modo tahan no aifuan sira mak iha toos laran. Maibe ne’e mos la fasil tanba sira tenke lao dook mak faan sira nia sasan. Dala ruma sira aluga kareta mak lori maibe ne’e mos ba sira karun.

Membru komunidade Ura-hou ida, Olga Expostu esplika oinsa sira buka moris iha tempu udan hanesan agora dadaun.

“Bainhira ami kuu modo ona ami organiza malu ho familia sira seluk. Quandu ami hetan to’o ema nain 10 hanesan ne’e ami husu kareta aluga hodi tula ba faan iha Dili. Osan aluga $150 ba-mai. Sira nia sasan bele folin to’o $100 kada ema, “ Olga esplika ba neonmetin.info iha Sede Suku Urahou, 18/01.

Situasaun moris ekonomia komunidade nian sei hetan perturbasaun makas. Sira nia esperansa mak governo bele tulun sira hodi bele rekupera lalais.

 

LEAVE A REPLY

Please enter your comment!
Please enter your name here