Reportajen Agustinha Amaral
Estudante Universidade Nasional Timor Lorosa’e (UNTL) ida, Nelia Maria Perreira orgullu, tanba promove ona sira nia produtu mina Aloe Vera 100% orgániku iha feira Festival Fronteira 2023 iha Maliana, Munisípiu Bobonaro no hetan mos rendimentu di’ak tebes. Nia ema ida independente, buka osan hodi selu rasik nia eskola, nia husu joven sira atu aproveita tempu, sai joven ne’ebé forte hodi buka rasik osan.
“Bazeia ba ami nia produtu lokal ne’ebé mak ho nia naran Aldiamond Shine, ami mai iha ne’e loron rua ona no rendimentu ne’ebe mak ami hetan bele ajuda ona ami iha prosesu fa’an nian di’ak tebes. Ami lori mai, ami nia produtu ho objetivu la’os atu hetan de’it iha rendimentu maibé atu promove ami nia produtu, atu komunidade sira bele hatene ami nia produtu, se wainhira sira presija bele kontaktu”, Estudante Nelia Maria Pereira ba Neon Metin iha Fetival Fronteira, iha Maliana, Kinta 17/11.
Nia dehan, sira nia produtu ne’e halo husi kompañia Aldiamond Shine husi munisipiu Lautem, agora da-dauk nia fatin iha Lospalos no iha Dili, sira nia produtu Aloe Vera oin 3 hanesan, Lidah Buaya, Bunga Kenanga no Mina Nuu. Mina Nuu husi Lospalos, Bunga Kenanga husi Aileu no Lidah Buaya husi Likisa, da-dauk ne’e mistura ka halo iha Dili.
“Ha’u nu’udar estudante hala’o estudu iha UNTL, Departamentu Komunikasaun Sosial no ha’u mai iha ne’e hanesan marketing Aldiamond Shine.”
Nia argumenta, mezmu ke nia estudante maibé nia iha inisiativu kaer osan rasik no la depende ba nia inan-aman tanba nia inan-aman da-dauk ne’e iha mundu seluk ona, ho ida ne’e mak fo forsa ba nia hodi buka osan rasik atu bele suporta nia eskola.
“Dezafiu ne’ebé mak hasoru durante fa’an nian mak hanesan dala ruma sosa na’in sira kontaktu hotu pois ita lori ba maibé to’o ne’eba sira hatun fali folin depois sira la hola tan no ita antar mos dala ruma uza transporte rasik, karik motor kompañia free mak sira ba antar ita.” Nia dehan.
Nia Espera katak produtu ida ne’e bele ajuda komunidade liu-liu iha ita nia nasaun no bele uza ho di’ak, iha benefísiu boot.
Iha parte selu nia konta, nia familia uma laran hamutuk sira na’in 3, feto ida mak nia rasik ho mane 2, “iha ami nia uma lisan ha’u mak henesan feto ida ne’ebé eskola no buka osan rasik atu sustenta ha’u nesesidade loro-loron, nune’e mos agradese tanba ha’u nia maun na’in 2 mos tau matan, la’os liu husi material de’it maibé liu husi espiritual, tanba ne’e mak ha’u forsa.”
“Mensajen ba maluk joven sira tantu feto no mane, lalika estraga tempu mai ita hamutuk atu buka maneira oinsá buka osan rasik no labele ta’uk atu buka osan tanba ne’e ita nu’udar joven tenke sai joven ida ne’ebe forte nafatin no labele depende ba inan-aman i labele sai atan ba ema seluk.”
