Reportajen Joselina dos Santos
Defisiente Frederico Soares no Jenifer S. da Costa orgullu tebes bele sai membru Alumi Parlamentu Foinsa’e Timor-Leste (APFTL), ba periodu 2024-2026. Maibé iha parte ida sente triste, tebes tanba durante iha kompetisaun ema balun halo diskriminasaun liuhosi termu ne’ebé la dignu, nune’e husu ba sosiedade liu-liu joven sira tenke konsidera ema ho defisiènsia maske diferensia ho fiziku maibé iha kreatividade ne’ebé hanesan.
“Ha’u kontente tebes tanba primeira vez bele simu posse, maske ho kondisaun defisiensia maibe bele kompete iha APFTL, tanba hetan apoiu husi maluk defisiénsia sira, atu bele hadia terminolojia ba ema ho defisiensia sira iha futuru, maske iha kompetisaun hasoru dezafius no hetan diskriminasaun maibe la lakon esperansa hodi kontinua ba oin”, dehan, Frederico Soares ba Neon Metin Iha Salaun GMN Bebora, Tersa 12/12.
Frederico husu ba maluk defisiénsia kuidadu aan, hodi prepara ba futuru labele tauk no moe ho kondisaun ne’ebé iha. Nafatin esforsu hodi luta ba ema ho defisènsia sira nia direitu laiha ema ida mak lakoi moris ho kondisaun ne’ebé diak tan ne’e tenke simu realidade no keta lakon vontade.
Iha fatin hanesan, Jenifer S. da Costa sente orgullu tanba bele inklina iha APFTL, maske tauk no moe ho kondisaun defisiente fiziku, maibé fiar aan no konsege liu. Maibe triste tanba iha kompetisaun ne’e kolega balun halo diskriminasaunp ka hasai termu ne’ebé la dignu hasoru sira.
“Ha’u fuan moras no triste bainhira rona kolega balun hasai liafuan ida katak ami ain kadik no alezadu, ne’e nusa la hakmatek iha uma mai tuir kompetisaun mós hanesan deit, sei la halo buat ida, maibe agradese tanba ohin loron ha’u hatudu ba sira katak ema ho defisiensia mos bele,” nia salenta.
Jenifer hakarak envolve iha Parlamentu Foinsa’e objetivu atu lori ema ho defisiénsia hodi dezenvolve ba iha postu to’o Suku atu sosiedade bele hatene klean kona-ba terus no susar ne’ebé ema ho defisiensia hasoru iha sira nia moris atividade loron-loron. Nune’e iha futuru hakarak dezenvolve ema ho defisiensia ba oin atu ema labele halo diskriminsaun tanba sira nu’udar ema umanu só diferente iha fiziku, maibé hanoin ka ideia ema hotu hanesan.
