Reportajen Agustinha Amaral
Vice Ministru Comércio Indústria (MCI) Augosto Junior Trindade hateten, ekipa Ministério Comercio Indústria hala’o hela monitorizaun iha teritóriu Timor-Leste hodi kria Bazar Baratu ba komunidade sira hodi festeza Natal ho Tinan foun.
“Ami halo monotorizasaun ba iha kompañia importador sira, tanba ne’e ami nia servisu iha ekipa boot ida, ita hotu hatene komérsiu iha hela tereinu para hodi haree liu-liu ba sasan sira ne’ebe kategoria nesesidade báziku ba tinan foun hanesan sektor fos, mina, masin-midar, manu-tolun, modo sira hodi hasoru ba tinan foun. Ami nia ekipa iha hela teritóriu Timor laran tomak, ami reforsa tan ho bazar baratu sei halo iha Dili rua ka tolu hanesan ne’e no iha munisípiu no postu sira ne’ebe iha área rural, ami sei buka meius nusa para hodi halo bazar baratu iha ne’eba”, dehan Ministru Augusto ba jornalista sira iha Palácio Presidensial Kinta-feira, 14/12.
Nia haktuir, Centro Lojístika Nasional (CLN) nia stock sei haree no akompaña hela kompañia rua oras ne’e la’o maka’as, sira komesa kompri sira nia kontratu 7.500 iha fulan tolu tanba fulan ida 2.500. Kompañia Kreti Furak no kompañia Perisos maibé ba hasoru natal ho tinan foun, oras ne’e rezolve hela stock para oinsá halo bazaar baratu no sei halo lansamentu.
Nia dehan informa, orsamentu foin dadauk halo kompras fos ho montante 4300 toneladas husi nasaun balun inklui Kambodia. Nia salienta, Centro Lojístika Nasional hanesan ajénsia autonomia ida ne’ebé sira iha rasik servisu no hasai sira nia osan rasik, hodi haree ba situasaun sira hanesan ne’e. Ba armajen CLN agora dadaun iha hela prosesu kompra hela produtu lokal, kompra mos fos husi rai li’ur iha tempo badak sei mai.
