Reportajen Filomena da Conceição
Fórum Organização Naun Governamental (FONGTIL) hamutuk ho organização sosiedade sivil ho IX governu konsituisional relaiza Diálogo Nasional entre Komunidade ho tema ” Hamutuk asegura partisipasaun ativu sidadadun hotu iha dezenvolvimentu ne’ebé rezilente no inkuzivu” iha Postu administrativo Turiskai Munisípiu Manufahi.
Komunidade João Mendonça husi suku Kaimau hateten, Nia parte apresia ba FONGTIL ho ninia membru ne’ebé realiza ona diálogu refere iha Postu Administrativo Turiskai tanba liuhusi diálogu ne’e Xefe suku sira bele hato’o preokupasaun povu nian ba Governu sira.
“Hau sente kontente no agradese tebes ba parte FONGTIL ho ninia membru lubuk ida ne’ebé mak organiza ona diálogu ne’e, iha ami nia rai Turiskai tanba foin primeira vez diálogu ida ne’e realiza iha ami nia postu”, dehan João ba Neon Metin, iha Pauzada Turiskai. Iha Postu Administrativu Turiskai, Munisípiu Manufahi, Sabadu 13/01.
Nia akresenta, liuhusi diálogu ne’e rona ona promesa barak husi ukun nain sira, no povu Turiskai hato’o mós sira preokupsaun lubuk ida ba parte relevante sira tanba ne’e nafatin iha esperansa ba govenu ne’ebé lideradu husi Xanana Gusmão bele responde sira nia preokupsaun ne’ebé sira hato’o ona.
Aliende de ne’e, Joana Soares husi alidea Turiskailau suku Liurai hateten, nia parte kontente tebes no orgulho ba parte FONGTIL tanba bele hili Turiskai sai hanesan fatin centru ba diálogu Nasional hodi povu bele hato’o diramente sira Nia preokupsaun ba governu.
“Hanesan Turiskai oan kontente tanba NGO FONGTIL hili ona fatin Turiskai bele sai fatin centru ba dialogu Nasional entre Komunidade ho Governu tanba turiskai hanesan fatin proklamator primeiru Presidente ba saudozu Nicolau Lobato nia fatin moris no mate,” dehan Joana.
Nune’e mos Diretor Executivo FONGTIL Valentim Da Costa hateten, objetivo FONGTIL hili Turiskai hodi relaiza dialogu Nasional refere tanba Turiskai hanesan fatin rai klaran, hodi ko’alia kona-ba povu nia moris.
“Ami hili Turiscai hanesan fatin rai klaran no halo exame oituan ba posto Turiskai hanesan fatin ikus hodi ita hasoru malu, nune’e ita hasoru malu duni iha fatin ida ne’e hodi ko’alia malu oi-oin hodi ko’alia kona-ba servisu sira ne’ebé ita halo iha ita nia governasaun, sesante no mós hahu governasaun Nonu governo hodi ko’alia kona-ba povu nia moris”, esplika Valentim.
Objetivu relaiza Diálogo ne’e hodi konvida membro governu sira atu bele rona diretamente preokupsaun povu nian ne’ebé hasoru iha terenu liga ba Assuntu Edukasaun, saude, agrikultura, no asuntu relevante sira seluk ne’ebé povu enfreta hela iha nasaun ne’e.
Entretanto Diálogo refere realiza hetan partisipasaun Maximu husi komunidade iha Turiscai, ministério MTCI, memburu parlamento, no organização resistência sira seluk.
