Reportazen Zevonia Vieira
Ho preokupasaun públiku nian konaba situasaun setor saúde, tanba aimoruk laiha no hapara hapara funsionáriu kontratadu sira iha ospitál no sentru saúde sira, liuhusi konferénsia imprensa, Sekretariu Jeral Organizasaun Resistência Nacional dos Estudantes de Timor-Leste (RENETIL), Joaquim Fonseca ‘Russuo’ apela ba membru RENETIL sira ne’ebe halo serbisu iha governu, husi Vice-Primeiru Ministru, Ministru sira, to’o Kompañeiru sira ne’ebe hala’o knaar tekniku oi-oin iha Ministeriu Saude nia laran, hodi foti atendimentu Saude ba sidadaun neé hanesan knaar sagradu ida ne’ebe sira hala’o hanesan kontinuasaun ba misaun atu Liberta Povu.
“Hala’o ita boot sira nia knaar ho responsabilidade no kometimentu. Ba sira ne’ebe mak halo parte ba Conselho de Ministros, lori asuntu neé ba diskuti hamutuk iha CoM, no fo solusaun neébe adekuadu. Karik labele rezolve problema ne’e, diak liu ita boot sira hakiduk de’it ona husi ita boot sira nia kargu”, dehan Sekretariu Jeral RENETIL, iha sede RENETIL, Farol, 15/01/2024.
Russuo mos informa katak iha fulan Junho 2023, RENETIL hamutuk ho Centro Nasional Chega! (CNC) halo diskusaun nakloke iha edifisiu Komarka Balide ho tema “Sistema Saude Nu’udar Instrumentu ba Libertasaun Povu”.
Diskusaun ida ne’e identifika problema sira hanesan, falta asesibilidade populasaun iha área remota ba fasilidade saúde, falta ekipamentus mediku no aimoruk, hodi fo atendimentu saúde neébe aksesivel no ho kualidade a povo toma.
Menus Rekursus umanus iha área saúde, hare hosi kuantidade, kualidade no distribuisaun, ladauk natón atu garante asesibilidade no fornese atendimentu saúde ho kualidade ba populasaun tomak.
Sekjen RENETIL hatutan Partidu sira ne’ebe konstitui Governu Konstitusional, hotu-hotu iha agenda klaru kona-ba saúde. Iha sira nia kampaña eleitorál, Partidu CNRT kompromete atu “dezenvolve área saúde ida ne’ebé inkluzivu ho kualidade. Partido Demokrátiku hatete dehan dezenvolve setór saúde, hadi’a Hospital Nacional Guido Valdares no hospital iha munisípiu sira. Governu Konstitusional dezigna postu Vice-Ministro Saude ida ho responsabilidade espesífiku ba Operacionalização dos Hospitais.
Tuir observasaun Neon Metin iha plataforma Sosial Media, hatudu diskusaun públiku ne’ebe kestiona konaba aimoruk hahu laiha, menus infermeiru/a sir iha sentru saúde, no fasilidade saúde nian ne’ebe la adekuadu hodi halo atendimentu ba pasiente sira iha munisípiu sira.
