Home Saude Postu Saúde Tolu iha Quelicai Halo Atendimentu Ba Pasiente Semana Ida Dala...

Postu Saúde Tolu iha Quelicai Halo Atendimentu Ba Pasiente Semana Ida Dala Ida, Tanba Menus Pesoál Médiku

1749
0
Postu Saúde Bualale, iha postu Administrativu Quelicai, Munisípiu Baucau (Foto-Filomena)

Reportajen David da Costa

Iha Postu saúde suku Lelalai, suku Bualale no suku Makalaku, iha postu Administrativu Quelicai, Munisipiu Baucau, laiha pesoal saúde iha postu tolu ne’e, provisoriu postu saúde tolu ne’e, semana ida halo atendimentu ba pasente dala ida, husi sentru saúde Quelicai, maibé antes ne’e postu Saúde tolu ne’e halo atendimentu ba pasiente sira semana ida dala rua, tanba menus mediku ka enfermeiru/a sira.

Xefe Centru Saúde Quelicai, Salomão Salustiano Gama, hateten, Sentru saúde iha postu Administrative Quelicai iha nia postu saúde hamutuk iha neen maka iha postu saúde Lelalai agora hein hela atu halo kontrusaun, Postu saúde Laisoulai, postu saúde Bualale, postu saúde Makalaku, no mós postu saúde Afaça.

Postu saúde balun iha Quelicai laiha pesoal saúde atu halo atendimentu ba iha pasiente sira bainhira moras, tanba iha sentru saúde Quelicai ne’e sei menus médiku no iha postu saúde ne’e pesoal saúde sira ne’ebé maka aloka ba iha postu saúde sira ne’e balun kontratadu hotu ne’ebé sira nia kontratu remata ona iha 31 dezembru 2023. Entaun sira la halo servisu ona no labele halo atendimentu ba pasiente sira.

Maibé Xefe Sentru Saúde halo ona orariu, no kontaktu direta ona autoridade lokal sira iha postu tolu ne’e, atu nune’e semana ida, iha postu saúde tolu ne’e bele halo atendimentu dala ida ba pasiente sira. Maibé antes ne’e postu saude tolu ne’e halo atendimentu ba pasiente ne’e semana ida dala rua deit, tanba  mediku sira menus. No iha tempu udan pesoal saúde sira labele ba to’o iha postu saúde Lelalai ho Makalaku tanba distansia ne’ebe dook no dalan aat.

“Ita nia Postu saude taka ne’e laiha, maibé pesoal saude maka menus, tanba sira nia kontratu para l iha 31  Dezembru 2023 ne’e. No Postu saúde balun ne’e pesoal saúde laiha, hanesan Bualale, ne’e uluk kontratadu maka iha ne’ebá, emfermeiru ida, maibé kontratu hotu ona. Iha Postu Saúde Lelalai no Postu Saúde Makalaku pesoal saúde maka laiha uluk kedas, tanba ita menus mediku. No uluk ne’e ita halo atendimentu ba pasiente ne’e semana ida dalarua, iha postu saúde tolu ne’e, maibé pesoal saúde balun nia kontartu remata ona entaun ita ema menus ba beibeik, tanba ne’e, iha postu tolu ne’e ita halo ona orariu foun ida para semana ida halo atendimentu dala ida ba pasiente, mas kuandu tempu udan ita dala ruma labele ba tanba distanisa dook,” dehan Xefe Sentru Saúde Quelicai ba Neon Metin liuhusi ViaTelefone, Segunda 22/01.

Alende nia nia mós ko’alia tan katak, postu saúde tolu seluk iha postu Administrativu Quelicai hanesan postu saúde suku Laisorulai, postu saúde Abafala no postu Saúde Afaça ne’e atendimentu la’o normal hela, tanba pesoal saúde ne’ebé atu halo atendimentu ba pasiente ne’e iha ne’ebá iha.

Nia haktuir tan, iha Sentru Saúde Quelicai, pesoal saúde ne’ebé nia Kontratdu remata iha 31 fulan dezembru 2023 ne’e hamutuk 17, No funsionariu Permanete iha centru saúde Quelicai hamutuk 33, ne’e inklui husi mediku no emfermeiru, parteira, farmasia, analista, cliner, kondutor no seguransa.

Nune’e mós Komunidade Suku Bualale  Terezinha Alves hateten, iha postu saude ne’e halo atendimentu ba ema moras ne’e semana ida dala ida, maibé foin dadauk pesoal saúde sira nia kontratu ne’e remata, afeita tebes ba  komunidade sira iha área rural ne’e, tanba susar ona atu hetan atendimentu lalais banihira  familia sira  moras.

“Hau sente triste tebes, tanba durante ami hetan atendimentu ho diak husi parte pesoal saude sira iha semana ida dala rua,  maibé besik fulan ida ona ami mai postu saúde taka hela deit no laiha pessoal saúde atu atende ami,”dehan Terezinha.

Nia haktuir, postu saúde hanesan fatin ida ne’ebé fasil ba sira  hodi hetan tratamentu lalais banhira sira nia  oan ka inan aman ruma  hetan moras, tanba ne’e, hakarak husu ba governo, liuliu ba iha Ministeriu Saúde atu haree ba problema ne’ebé maka komunidade sira hasoru iha area rural.

Print Friendly, PDF & Email

LEAVE A REPLY

Please enter your comment!
Please enter your name here