Home Saude FONGTIL no REBAS Deskobre Bee, Saneamentu no Fasilidade Iha Postu Saude Kondisaun...

FONGTIL no REBAS Deskobre Bee, Saneamentu no Fasilidade Iha Postu Saude Kondisaun La Diak

995
0
Rede ba Saúde hamutuk ho Reprezentante Ministériu Saúde no Reprezentante Sosiedade Sivil iha ámbitu hato'o problema saúde iha Teritóriu. [Foto: Agustinha| 11.03.2024]

Reportajen Agustinha no Zemilia

“Dezafius sira ne’ebe liga ba profisionál saúde, hodi fornese tratamentu ba sidadaun sira iha nafatin problema, ai-moruk sidadaun sira la hetan iha Postu Saúde no mos saneamentu ne’ebe mak estabele iha postu saúde seidauk adekadu”, Joaquim

Forum Organizasaun Naun GovernamentalTimor-Leste (FONGTIL) no Rede Ba Saude Timor-Leste (REBAS-TL), organiza dialog nasional, ne’ebe foku liu problema saude ne’ebe seriu, no hamosu preokupasaun barak husi sidadaun sira konaba situasaun saude ne’ebe bele hamosu risku.

Nune’e Diretór Ezekutivu FONGTIL, Valentim da Costa Pinto ba Neon Metin hateten,  problema saude  ida ke seriu ne’ebe hamosu preokupasaun barak husi sidadaun sira, FONGTIL iha fulan rua ba kotuk kedas, ho membro sira iha inisiativa no halo levantamentu ida kona-bá prestasaun servisu  iha posto saude hotu iha territorio Timor laran tomak, no mós husi dialogo ida ne’e atu hatudu katak sidadaun hotu iha direitu, atu asesu tratamento saude ne’ebé mak digno.

“Dialogo ida ho ami, aproveita aprezenta ami nia dezkobrementu, no sira rona direta asaun prioridade ne’ebé Ministerio Saude bele haree no bele solusiona, ami nia dezcobrementu ida mak Ministerio Saúde sira tenki tau atensau nafatin ba  situasaun aimoruk laiha, ita nia pasiente sira bele tur horas rua ka tolu, hodi hein doutór/a sira, fasilidade ne’ebé ladun adequado,  fatin mos la próprio, entaun nafatin fo risko ba sira nia saude, ho situasaun sira ne’e pasiente sira mak sai nafatin vitima no sira lakon sira nia direitu atu asesu ba saúde ida diak liu iha sira nia nasaun rasik” dehan Diretór Ezekutivo FONGTIL iha salaun Hotel-Timor, (10/03).

Diretór Ezukutivo ne’e haktuir laiha bee no saneamentu ba fasilidade, posto saude sira ne’ebé konstrui la funsiona, la halo operasaun tanba limitasaun rekursus humanus, no kondisaun seluk tan, gestao ambulansia, sasan barak ne’ebe ke ami detekta ne’e hanesan importante los para tenki alerta sedu informa sedu ba ita nia ministeriu saude  bele foti asaun lalais. Tanba saude ne’e hanesan direitu baziku ida, kuandu sidadaun sira bainhira nia vizita mak nia la hetan tratamentu ne’ebé ke diak, ne’e hanesan violasaun ba direitus humanus sira, ida nee mak ami hakarak inisia dialogo ida ne’e, hanesan gesto ba prátika auditoria ida ne’ebé ke halo liu-liu kona-bá prestasaun servisu.

Diretór Valentim salienta liu tan, díalogo ne’e aprezenta REBAS-TL fó oportunidade atu apresenta avaliasaun bazeia ba evidensia kona-bá asuntu saúde, hanesan rekursu humanu, produto médiku no fasilidade saude.

Advokasia ne’ebé hetan apoio dadus husi OSS sira sei kontinua liu tan interesada xave sira seluk inklui, maibe la’os deit ho OSS sira, estudante saude sira husi universidade no klinika saude privadu nian reprezenta mós apoiu kolaborativu dezenvolvimentu estratejia no aproximasaun sira hodi responde ba kestaun no dezafiu saude sira. Parte interesada sira iha Sistema saude envolve ativamente, oferese idea, kritika konstrutivo, no solusaun pratiku atu hametin Sistema saude iha saude nasaun ida nian.

Iha fatin hanesan, Kordenador Jeral Rede Ba Saúde, Joaquim Freitas Soares hateten Problema ne’ebé Rede ba Saúde detekta hetan iha Postu Saúde hanesan fasilidade ba pasiente sira la permite, sedauk iha melloramentu di’ak ba kondisaun saúde.

“Dezafius sira ne’ebe liga ba profisionál saúde, hodi fornese tratamentu ba sidadaun sira iha nafatin problema, ai-moruk sidadaun sira la hetan iha Postu Saúde no mos saneamentu ne’ebe mak estabele iha postu saúde seidauk adekadu”, dehan Joaquim

Nia haktuir, kuaze Postu Saúde sira ne’ebé mak halo survey problema hanesan. Sira halo tarjetu ba munisípiu 10 inklui Oecusse, en termus fasilidade saúde liga mos ba ai-moruk hanesan. Nia mos preokupa tanba to’o agora ita seidauk iha laboratóriu própriu ida atu teste ai-han sira ne’ebé importa mai Timor-Leste, ita kiak ba saúde, kiak ba edukasaun, kondisaun moris kiak nafatin.

“Ema mai lohi tan ita lori ai-han sira falsu husi nasaun seluk mak mai, laiha mekanizmu di’ak atu kontrolu, ita nia ema sira mate barak mos ba buat sira ne’e.” Nia dehan.

Iha fatin hanesan, reprezenta Diretora Ministériu Saúde, Delia Monis Bareto hatete, ho sosiedade sivíl sira nia survey iha komunidade, nune’e Ministériu Saúde hakarak foti biban ida ne’e atu bele rona direita husi reprezentasaun sira, hosi rezultadu pre-limináriu mak fo sai hosi Rede Ba Saúde, nune’e hein ninia rezultadu final.

“Ministériu Saúde akapta ona katak iha pontu balu mak sei presiza hadi’a iha Ministériu nia parte, liu-liu ba iha ita nia fatin, pasiente sira ne’ebé mak bainhira atu hetan atendimetu ladun iha fatin dignu ba sira, hodi tuur ba hein atendementu husi profisional saúde sira, ida seluk mak menus medikamentu, Ministériu mos husu variavel ne’ebe mak sira foti hanesan peskiza tau hamutuk medikamentu atu nune separa tiha ne’e Ministériu bele hatene liu ida ne’ebé mak sai liu problema ba prestasaun saúde ba komunidade sira.” Dehan Dra. Delia

Ministériu Saúde nafatin servisu hamutuk ho sosiedade sivíl sira liu husi  pekiza, sujestaun no rekomendasaun hotu Ministériu Saúde sei halo maibé fiar katak sei esforsu tomak bele lori liu saúde ba ita nia komunidade sira.

Print Friendly, PDF & Email

LEAVE A REPLY

Please enter your comment!
Please enter your name here