Reportajen David da Costa
Relasiona ho liña internet ne’ebé oferese husi kompaña Timor Telekom, Telemor no Telekomcel ne’ebé maka agora nia liña internet kontinua la’o lentu, Ministériu Transporte Telekomunikasaun (MTK) promete katak iha tinan 2025 laiha ona problema liña internet tan.
Ministru Transporte Telekomunikasaun (MTK) Miguel Manetelu hateten, solusaun úniku atu responde ba liña internet ne’ebé la’o lentu liu maka kabu submarinu, no estadu halo investimentu ba fiber optika ne’e, tanba kestaun liña internet ne’ebé lentu ne’e.
“Ita nia kapasidade Bandwidth husi operadór telekomunikasaun tolu ne’e no ISP sira ne’ebé fornese internet sira nia kapasidade mak nune’e ona, tanba ne’e estadu deside halo investimentu ba kabu submarinu,” dehan MTK Miguel Manetelo ba jornalista sira iha Palásiu Prezidensiál Bairo-Pite, Sexta 12/04.
Nia haktuir, operadór telekomunikasaun Tolu hanesan Timor Telkom, Telekomcel nomós Telemor nia kapasidade maka hanesan ne’e ona, Tanba ne’e estadu investimentu iha submarinu ona ne’ebé iha tinan 2025 laiha ona problema liña internet ona.
“Ita hein uitoan hanesan ha’u hatete bei-beik ona no ita hakat ba 2025 ita laiha ona problema liña internet,”nia promete.
Nia esplika, tanba ne’e kona-ba problema liña internet lenuk laiha solusaun seluk, Bainhira jornalista sira husu beibeik hatan maka ida ne’e, sei labele promete ne’ebé labele halo no estadu nia solusaun mak investimentu ba kabu submarinu ne’ebé sei jere husi governu.
