Home Notisia Ho Votus 6 Otelio Eleitu Reprezenta Media Nain Iha KI, Ote: tenke...

Ho Votus 6 Otelio Eleitu Reprezenta Media Nain Iha KI, Ote: tenke respeita rezultadu

158
0
Otelio Ote bainhira tuir votasaun sekretu iha konferensia media nain nian. [Foto: Santina Lucia da Costa | 15.09.2020]

Reportazen Santina Lucia da Costa

“Ita boot sira baibain hatene, hau sempre uza aproximasaun kultura, hau sempre di’ak ba ema hotu, hau tenki hakbesik-an ba ema hotu, media hotu-hotu, ita koko para renova fali ita nia karakter hanoin, ita nia karakter asaun, katak komunikasi media ne’e tenki iha, labele ida fali media boot, media ki’ik no ida fali media profisional ne’e laos”. Otelio Ote

Konsellu Imprensa (KI) realiza konferensia hodi hili mídia na’in sira, hodi reprezenta orgaun komunikasaun sosial iha Konsellu Impresa ba Periodu 2020-2024.

Iha konferensia ne’e, mídia na’in sira aprezenta pakote 3 mak hanesan Jose Ximenes, Oteliu Ote no Raimundu Oki no sai manan nain iha eleisaun mak Otelio Ote hosi Dili Weekly ho votus neen (6) no kandidatu Jose Ximenes hetan votus hamutuk 4 no Raimundu Oky hetan votus 3

Husi pakote tolu ne’e kandidatu Otelio Ote nia proponente na’in 3 mak hanesan Dili Post, RTTL no TVE, kandidatu Raimundo Oki nia proponente na’in 3 mak Time Timor, Naunil no Lafaek News no kandidatu Jose Maria Ximenes nia proponente 3 mak Tatoli,ip, Time Timor no Radio Voz.

Manan nain Otelio Ote iha nia deskursu dahuluk hateten eventu ne’e importante tebes tanba ne’e mak ita tenke respeita rezultadu hosi konferensia ida ne’e

“Ita boot sira baibain hatene, hau sempre uza aproximasaun kultura, hau sempre di’ak ba ema hotu, hau tenki hakbesik-an ba ema hotu, media hotu-hotu, ita koko para renova fali ita nia karakter hanoin, ita nia karakter asaun, katak komunikasi media ne’e tenki iha, labele ida fali media boot, media ki’ik no ida fali media profisional ne’e laos”, hateten Otelio Ote iha salaun Delta-Nova, loron, 15/09.

Otelio Ote akresenta Konsellu Imprensa laos fatin permanente ba ita, konsellu imprensa fatin ne’ebe sai komisariu ka konseila de’it, ita seidauk hatene saida mak sei todan, saida mak sai kmaan iha ita nia  serbisu fatin, se ita kontinua serbisu, ita kolabora iha jestaun serbisu ida ne’e ho tempu ida-idak nian.

“Klaru hau kontribu maka’as no hau individu di’ak liu konsentra de’it ba konsellu impresa, hau prontu ba serbisu hamutuk ho kolega sira iha konsellu imprensa, hau sempre prontu”, dehan Otelio.

Otelio hatoo ba media nain sira ne’ebe maka la partisipa iha konferensia ida ne’e, ita kontinua hamutuk ba komunidade media ne’e laos komunidade seluk, komunidade media laos partidaria, ne’ebe hamutuk de’it, ita sei serbisu hamutuk, hau sei hakbesik-an ba iha sira ne’ebe ke ohin la partisipa iha konferensia ne’e, atu ita iha vizaun ida hakarak ida no objetivu ida.

Iha fatin hanesan Prezidente Konsellu Imprensa (KI), Virgilio da Silva Guterres hateten ho prezensa Otelio Ote ninian iha Konsellu Imprensa, hanoin sei reforsa liu tan Konsellu Imprensa nia papel ida, atu hatur iha asosiasaun jornalista sira, mídia na’in sira, atu hametin informasaun, hasae kualidade jornalizmu nian no mos kualidade jestaun ida ne’ebe bele ajusta ho era dijitalizasaun.

Virgilio da Silva Guterres dehan mídia sira ne’ebe ohin la partisipa Konsellu Imprensa sei kontinua tau matan ba preokupasaun sira ne’ebe asosiasaun ba media hato’o, ba buat balun ne’ebe mak konsellu imprensa haree katak konsellu imprensa ninia kompetensia, konsellu imprensa sei buka atu halo tuir.

“Preokupasaun balun laos konsellu imprensa ninian, hau hanoin ita hotu hamutuk, atu hato’o ba orgaun ne’ebe kompetente atu nune’e bele hadia, liuliu kona-ba interpretasaun lei komunikasaun sosial no mos estatutu konsellu imprensa nian, kona-ba inkompatibilidade ba balun iha ne’eba, ne’e presija hadia iha tempu futuru mai”, dehan Prezidente KI.

Tuir observasaun Neon Metin, mídia hamutuk 18 ne’ebe sertifika husi KI no publika ona iha Jornal da Republika, maibe nain 13 mak partisipa konferensia ne’e no mídia 4 hanesan GMNTV, Timor Post, GMN Group no jornal Independente.

LEAVE A REPLY

Please enter your comment!
Please enter your name here