Reportajen Adroaldo “Saretuku”
Komunidade Suku Cunha, Postu Administrativu Pante-Makasar, RAEOA, nia preokupasaun barak liu mak estrada, tanba tempu udan difikulta tebes agrikultór lori produtu ba merkadu, no difisil ba sira atu lori pasiente ne’ebé hetan moras no inan isin-rua sira, asesu ba iha Sentru Saúde hodi halo tratamentu.
“Atu lori sira (agrikultór) nia produtu mai merkadu (susar tanba estrada aat) i bainhira hetan moras, liu-liu iha tempu udan, inan-feton sira ne’ebé atu partus mai ospital, ne’e tenki hetan apoiu, ajuda hosi komunidade balu, dala ruma iha tempu udan hulan de’it, hulan de’it mak atu lori mai ospital hodi hetan tratamentu i sira ne’ebé mak atu lori nia produtu mai, liu-liu iha tempu udan labele lori mai tanba estrada aat, kareta labele asesu ba,” Xefe Suku Cunha informa ba Neon Metin, tersa-feira, 14/06.
Nia hatutan, komunidade sira atu asesu ba merkadu tenki ba Tono, Pune no balu to’o merkadu Oe-cusse. Ba Sentru Saúde iha Baqui ho diresaun ida de’it ho distánsia la’o ain mais ou menus kilómetru 5-6, no difikuldade seluk mak komunidade tenki la’o hakat mota rua no mota refere seidauk iha ponte.
Suku Cunha iha klínika rua, iha Bise’o no Maunaben, maibé tanba área luan no dook malu, nune’e difikulta aldeia Noe-Nine no Quiupana nian, tanba ne’e sira ba halo tratamentu iha Sentru Saúde Baqui, “mais iha ne’ebá mos hakat mota rua, tempu udan araska,” dehan líder lokal ne’e ba Neon Metin.
“Pedidu ami hatama ba atu hadi’a estrada ne’e tinan-tinan, ami halo de’it $3.00 nian, sira hatete ne’e tama hotu ba planu ZEESM nian, mais to’o ohin loron seidauk halo, estrada sira ne’e to’o área rural nian,” dehan Xefe Suku Cunha Domingos.
