Home Justisa Sobrevivente 12 Novembru: Governu Presiza Fó Atensaun Ho Dignu no Buka Tuir...

Sobrevivente 12 Novembru: Governu Presiza Fó Atensaun Ho Dignu no Buka Tuir Martires

1070
0
Sobrevivente 12 Novembru Dulce no Rui. [Foto: Santy | 12.11.2021]

Reportajen Ray Vieira

“Maioria mak sedauk hetan sira nia direitu, iha 75% mak sedauk hetan sira nia direitu. No sira presiza tebes hetan tratamentu saúde hodi rekupera fali sira nia saúde no psikolojia”. Mouris

Timor-Leste komemora loron masakre Santa Cruz ba dala 30, nu’dar parte husi luta Loriko As’wain ne’ebe kontribui sira nia-an, hodi luta ba ukun rasik-an.

Iha loron komemorasaun ne’e, sobrevivente sira barak sei kontinua halerik konaba injsusitsa ne’ebe mak sei akontese iha sira nia moris.

Neon Metin dadalia ho sobrevivente Dulve de Fatima Ximenes Guterres da Silva “Kabatak” ne’ebe partisipa mos iha manifestasaun iha loron 12 Novembru 1991, ba Neon Metin Kabata dehan ohin loron 30 ba masakre 12 Novembru, povu bele goza husi ran ho ruin hodi liberta nasaun ida ne’e, maibe ladún satisfás ho situasaun ne’ebe sobrevivente sira hasoru.

“Ami sente kanek tebes tanba sa  30 ano ona to’o ohin loron ami nunka atu simu uniforme ida ne’ebe maka di’ak. Ba ami nia isin lolon, ropa ida ne’ebe uluk ami hatais, ami hodi halo asaun libertasaun ba povo ida ne’e, maibe ukun rasik-an ona hola ropa tahan ida ami uza to’o ohin loron 30 ano”, tenik Dulce iha ámbitu komemorasaun 12 Novembru iha Santa Cruz.

Maibe Dulce dehan nafatin orgullu no kontente tanba ita liberta povu husi situasaun ne’ebe mak la diak, ita iha situasaun ne’ebe mak terus liu iha funu laran. Funu ida nebe maka hakarak hakanek no haterus povo hotu, “30 ano valor ida ne’ebe maka diak mai ami ne laiha, laiha valor dignu di’ak ida mai ami”.

Neon Metin karik hetan ona direitu nu’udar sobrevivente husi governu? Ba Neon Metin Dulce hatán sorin balu ami hetan ami nia direitu, no sorin balu barak maka seidauk hetan ami nia direitu, husi 2003 to’o ohin loron dehan aprova, maibé to’o ohin loron ema barak maka moris sei terus nafatin, barak maka agora moras, maibé estadu la tau matan, barak maka ne’ebe sofre ho família laen sobrevivente mate soe hela fen ho oan, estadu la tau matan.

Nune’e sobrevivente ne’e ezije ba governu no estadu tau atensaun ba sobrevivente sira ho dignu, labele tau ami hanesan sapatu sola.

Iha fatin hanesan sobrevivente Rui Ilidio de Araujo “Arma” ba Neon Metin hateten tinan 30 ba kotuk ho espíritu aten brani ho emosionál hodi hakilar ba ukun rasik-an.

Nia dehan durante ne’e estadu rekoñese sobrevivente sira nia direitu, maibe falta partisipasaun, nune’e kolega balun la inklui.

“Hau rasik foin rejistu iha tinan 2009 foin dadauk mak verifika, maibe kolega brak hetan ona benefisiáriu”, dehan Arma

Nia mos ezije ba governu bele hare fila fali mortais ne’ebe mak lakon to’o ohin loron, sei iha lubuk ida mak hetan.

“Ami husu governu ho estadu Indonesia bele buka meius atu rezolve problema ida ne’e, para ita bele harii monumentu ne’ebe makd iak, pelumenus restu mortais ne’ebe hetan, atu bele tau netik iha semetirik Santa Cruz

Nia mos dehan governu fo ona apoiu ba sobrevivente sira nia oan lihusi edukasaun, hodi oan sira hetan bolsu estudu, balun mos hetan serbisu ona.

Entertan lihusi talkshow iha studio Radio Televisaun Timor-Leste (RTTL), iha loron 9 Novembru 2021, Prezidente Commite 12 Novembru Gregóriu Saldanha “Mouris” informa katak Committee 12 Novembru halao ona serbisu lubuk ida hodi rekolla dadus sobrevivente sira iha Timor laran tomak, hodi nune’e sira bele rekupera sira nia moris, maibe maioria mak sedauk hetan tratamentu ka hetan sira nia direitu.

“Maioria mak sedauk hetan sira nia direitu, iha 75% mak sedauk hetan sira nia direitu. No sira presiza tebes hetan tratamentu saúde hodi rekupera fali sira nia saúde no psikolojia”. Dehan Mouris.

Print Friendly, PDF & Email

LEAVE A REPLY

Please enter your comment!
Please enter your name here