Home Notisia Lu Olo: Sobrevivente Sira Sai Mestre Ba Jerasaun Foun Oinsa Hadomi Povu...

Lu Olo: Sobrevivente Sira Sai Mestre Ba Jerasaun Foun Oinsa Hadomi Povu no Patria

293
0
Prezidente Republika, Dr. Francisco Guterres Lu Olo. [Foto: Santy | 12.11.2021]

Reportajen Santina Lucia da Costa

Iha komemorasaun masakre Santa Cruz ba dala-30, no selebrasaun loron nasionál Juventude ba dala-16, Prezidente Repúblika, Dr. Francisco Guterres Lú Olo, husu joven ida-idak atu buka valoriza-an liután, liuhusi estudu no koñesimentu, atu sai profisionál efisiente no efetivu.

Prezidente Repúblika, Dr. Francisco Guterres Lu-Olo hateten ohin ita mai halibur iha fatin ida ne’e, atu valoriza liután erói no mártir sira nia memória, liga liuliu ba sira ne’ebé barani halo manifestasaun, iha 12 novembru 1991, hodi afirma ita nia mehi koletivu Ukun rasik-an.

Xefe Estadu dehan 12 Novembru konsagra ona husi Estadu nu’udar loron nasionál Juventude. Ho komemorasaun ba dala-30, saída loos mak juventude tenke halo no oinsá banati tuir espíritu 12 Novembru husi ohin ba oin?  

Tema joven sira hili ba eventu ohin nian mak, “Ho espíritu aswa’in 12 novembru nian, juventude sai autór importante ba proteje Timor-Leste hosi Covid-19.” Tema ne’e diak tebes tanba joven sira preokupa ho saúde povu nian. 

Lu-Olo realsa moras Covid -19 sei nafatin sai preokupasaun boot ida iha mundu tomak, inklui Timor-Leste. Moras ne’e lakon mosu, ho variante oioin, no ita ema mak tenke haree oinsá proteje-an.  País hothotu, riku ka ki’ak, boot ka ki’ik, halo esforsu tomak atu hasae imunidade ema hotu nian liuhusi vasina.

Lu Olo dehan membru Governu Timor-Leste tuun ona ho profisionál saúde sira, no hamutuk ho autoridade lokál, konsege hasae taxa vasina, maibé ita seidauk konsege vasina ema hotu!

“Ho laran ksolok tebes mak hau simu informasaun husi Sekretáriu Estadu Juventude no Desportu katak Centro Juventude, iha munisípiu sira, organiza-an ona atu haforsa Governu ninia kampaña sensibiliza komunidade kona-ba importánsia simu vasina hasoru Covid-19.” Hateten, Prezidente Repúblika, Dr. Francisco Guterres Lu-Olo, iha nia mensajen iha Rate Santa Cruz, 12/11.

Nia salienta joven sira hakarak apoia Governu iha kampaña vasinasaun ida ne e. Hakarak ida nee  mai husi fiar katak ho vasina mak    Povu  proteje-an diak liu hasoru moras Covid-19.

Prezidente Repúblika apela ba joven ida-idak, atu buka valoriza-an liután, liuhusi estudu no koñesimentu, atu sai profisionál efisiente no efetivu, no nune bele intervein di’ak liután iha programa rekuperasaun ekonómika atu hasa’e moris di’ak ba Povu tomak.

“Hau fiar katak espíritu 12 Novembru sei fó naroman nafatin ba ita nia Timor-Leste livre no independente. Joven Loriku As’wain, sobrevivente sira bele sai mestre ba jerasaun-foun ohin loron no aban bainrua, oinsá hadomi povu no pátria, ho espíritu 12 Novembru.”  Dehan Lu Olo.

Print Friendly, PDF & Email

LEAVE A REPLY

Please enter your comment!
Please enter your name here