Home Meio Ambiente Guarda Floresta Iha Parque Nino Konis Santan La iha Ekipamentu Sufisiente, Komunidade...

Guarda Floresta Iha Parque Nino Konis Santan La iha Ekipamentu Sufisiente, Komunidade Kasa no Tesi Ai Ilegál

1216
0
Ema ida lori kilat manu nian iha Post Lore. [Foto: Juvinal | 13.06.2024]

Reportajen Juvinal Cabral dos Santos

Parque Nasional Nino Conis Santana (PNNCS) ne’e kompostu husi Postu Administrativu Tutuala, Lospalos, Lore no Iliomar, iha ne’eba suku sia (9) maka iha laran hanesan dadauk katak Parque Nasional ne’e estadu tenke rekruta guarda floresta ba Parque ne’e maibe sira nia vida iha ameasa nia laran

“Wainhira halo patrollamentu hasoru ameasa oi-oin, dala ruma ami ba iha ai laran hetan kasa ilegal, prende tesi ai ilegal, ema sira mai ho katana ho kroat sira seluk  ami tenke hakiduk tamba fasilidade hanesan radiu komunikasaun atu komunika malu la iha, stik la iha, hein sira tun oituan mak desamina informasaun kona ba lei bandu tesi ai arbiru no kasa animal fuik sira.”Dehan guarda Floresta Mario da Costa ba Jornalista sira iha nia rezidensia Postu Administrativu Lore, Munisipiu Lautem 31/05/2024

Guarda Floresta Mario da Costa. [Foto: Juvinal | 13.06.2024]

Iha area Parque Nasional Nino Konis Santana mak ai laran sira sei orijen, biodiversidade animal fuik sira iha oin-oin hanesan rusa fuik, laku, meda, lekirauk no grupu manu fuik sira hanesan manu pombu, niki, kakatua, manu kakuk no mos grupu samea sira ne’e ejiste antes ita iha.

“Nu’udar korpu guarda floresta ami iha misaun ida tenke kontrolu másimu maske ami nain tolu deit maibe ami halo orariu hodi loro-loron ami hala’o patrollamentu no monitoriza iha dalan Lore ba Lospalos atu bele asegura rikusoin sira no atividade ilegal sira ba merkadu no ba fatin seluk.”

Guarda Floresta dehan uluk maluk Modesto deit labele kobre hotu ba ai laran sira entaun ema kasa no sabadu-sabadu ema fa’an na’an laku iha merkadu Lospalos maibe iha tinan 2021 rekruta tan sira  mai hamutuk ho nia, sira nain 3 esforsu hamutuk agora minimiza uituan atividade ilegal ona

“Ita hare’e iha merkadu ema la fa’an ona na’an laku no na’an rusa iha merkadu no atividade tesi ai  ilegal hanesan ai kualidade mudial ne’e balu-balun sei lakon maibe iha loron 25 maiu tinan ne’e, ami konsege kaptura ema ida iha dalan Trans nian besik Lospalos, ema ne’e husi parte Lori nian lori ai kameli atu fa’an iha merkadu mais ou menus kilograma 70 ka 80 hanesan ne’e tamba se  sira lori barak entaun prezudika sira. Sira foti barak liu ita toman kaer lori ba tribunal hodi tuir prosesu ba komarka konforme juis sira nia desizaun. Ai sira ne’ebe ami preende entrega ba Munisipiu to’o nia tempu ema leilaun bele uza no ai kameli balun ne’ebé ami foti sei iha armajen no ai ne’ebé leilaun osan iha iha nivel munisipal.”

Komunidade sira halo to’os iha Parque Nasional Nino Conis Santana ne’e agora menus ona, la hanesan uluk guarda floresta seidauk mai tamba iha zona tolu maka hanesan Zona inti, Zona trapaun no Zona tranzisaun ne’e hetan kotrolu husi korpu guarda floresta.

Zona inti mak ai laran orijen ne’ebe husi beiala sira to’o agora ema nunka halo to’os no natar  iha ne’eba. Zona trapaun mak ai laran ne’ebe depois de Portugal mai komunidade sira halo to’os iha ne’eba maibe Indonesia mai okupa, durante funu laran sira la halo to’os no natar entaun  to’o agora ai hun bo’ot barak fali sai ai laran ona.

Zona tranzisaun mak depois ukun an komunidade sira halo to’os no natar iha ne’eba maibe agora koñesementu agrikultura menus entaun zona ne’e mos ai komesa moris fali iha ne’eba atu ba Zona trapaun ona.

Mario hateten komunidade sira la halo to’os no natar ne’e obstakulu moris tamba la hatene oinsa bele prodús hare no batar afinal iha Parque Nasional Nino Conis Santana ne’e rai luan no iha  mos rai produtivu maibe komunidade sira buka diak deit, komesa menus ona koñesementu halo to’os no natar, estadu mos husik deit  sei influensia ba nasaun nia dezenvolvimentu.

Mudansa Klimatika iha duni maibe iha Parque ne’e iha parte marina iha tasi ibun Lori ai-parapa sira balun mate, haree mos iha Laivai mos barak mak mate kauza impaktu klimatika no balun mate tamba kauza sosiedade balun seidauk iha koñesementu ambiental, soe plastiku arbiru entaun mota lori ba tasi laloran baku ba ai parapa sira nia oan mate lobele hotu entaun agora ai horis ne’e menus.

“Animal fuik sira iha Parque ne’e la naran mate maibe komunidade sira maka kasa ilegal barak liu ne husik deit maka impaktu boot tamba estadu seidauk iha lei seguransa ba kilat manu no material  kasa nian seluk entaun komunidade sira uza kontinua kasa tamba ami nain tolu deit labele kontrolu hotu iha Parque ne’e.  Maske  nune’e ami nain halo esforsu maibe labele kombate atividade ilegal ne’e total tamba ho kondisaun minimu.”

Komunidade balun sei uza kilat manu tamba guarda floresta iha Lore nain 3 deit, halo patrollamentu iha sorin kasador mosu iha parte karuk entaun nafatin iha atividade ilegal ne’e.

“Durante ne’e ami ho esforsu ne’ebe iha konsege preende kilat manu 4 no mos meda hamutuk sanulu resin, niki no manu fuik ne’ebe sira kasa. Iha tinan 2021 rekruta ami hodi destaka ami mai iha Lore, atividade da-uluk mak ami tama sai aldeia no suku fo sensibilizasasun kona ba rikusoin no ai horis, animal proteizidu sira ba komunidade sira maibe sira nia karakter maka seidauk mudansa katak sente animal sira moris rasik no ai horis sira moris rasik afinal ne’e fonte rendimentu ba nasaun nia dezenvolvimentu.”

Guarda Floresta ne’e haktuir maske korpu guarda floresta iha Lore sira nain 3 de’it maibe ne’e laos sira nia obstakulu, sira esforsu nafatin halo sensibilizasaun, monitorizasaun no patrollamentu hodi kontrolu sirkulasaun atividade ilegal iha Lore.

Iha Lore aplika regulamentu UNTAET nian iha artigu 17/2006 bandu ema labele tesi ai, artigu 19/2000 dehan labele tesi ai iha area protezida sira, iha mos artigu 14/2017 koalia kona ba regime jéral floresta ninian no mos ba fali artigu 6/2020 ne’e kona ba protesaun biodiversidade Parque Nasional Nino Conis Santana nian tamba ne’e sensibilizasaun ne’e lao nafatin atu nune’e komunidade sira muda karakter hodi proteje rikusoin lolos.

“Se ita hare’e deit ba mina to’o tempu hotu, la iha rendimentu ida atu troka ida ne’e tamba mina rai rendimentu ne’ebe inrenovavel ne’e duni wainhira estadu investe barak ba biodiversidade aban bainrua biodiversidade ne’e maka sei fo rendimentu ba ita. Oinsa maka ema fo rendimentu mai ita liu husi ai Kameli sira, Governu tenke halo programa barak liu ba ita nia sosiedade sira kuda ai kameli iha sira nia kintal ka knua rasik atu nune’e aban bainrua troka fali rendimentu ne’ebe la iha ona.” Guarda Floresta Esplika

Mario dehan komunidade atu iha konsensia diak liu maka Governu tenke halo sensibilizasaun husi nivel Nasional to’o mai lokal atu nune’e sira iha duni sentimentu ida to’os nain ne’e iha tamba durante ne’e sosa deit husi loja ne’ebé mai husi sasan importasaun maibe dala barak la iha intervensaun ruma afinal ida ne’e impaktu ba ita nia finansiamentu iha loron ikus.

La iha impaktu husi Parque Nasional Nino Conis Santana wainhira komunidade sira nia to’os fatin no natar fatin ne’e estadu ejiji nafatin atu halo to’os no natar iha ne’eba maibe ai ne’ebé boot ona tenke husik no halo kordeanasaun oinsa maka nafatin halo natar iha Parque Nasional.

“Ami presiza tebes atu konserva ai iha Parque Nasional maka ai kameli,ai gaharu maibe agora iha maka nomor 7 no 9 mak iha, nomor ida ne’e seidauk iha, karik iha oeste mak iha maibe esensial liu ne’e ai kameli depois ai naha, ai besi, ai mahon hanesan ai industria mundial ne’e mos iha folin.”

Manu kakatua iha Paque menus ona tamba tempu Indonesia okupa Timor, Indonesia sira presiza los, komunidade sira nia ekonomia mos la serteza, entaun kaer hodi fa’an ba 5rb no 10 rb osan rupiah Indonesia nian, tempu agora karik fa’an ba sentavus 5 maibe la sente katak  ida ne’e mos atrai ema hodi mai  Timor, agora iha Parque Nasional kakatua menus tamba sosiedade sira sobu nia knuk no nia fatin.

Manu ne’ebe maka konserva ai maka manu pombu mutin boot ne’e  b han ai Kia musan no niki han ai fuan ba soe musan iha fatin seluk bele moris barak liu-liu bee matan sira, tamba ne’e presiza proteze sira.

Kasa iha Parque Nasional ne’e laos Postu Lore deit maibe husi Postu seluk mos mai kasa ilegal, wainhira ami kaptura, entrega ba superior sira maka fo sasaun.

Parque Nasional Nino Conis Santana ho nia medida ne’ebe boot ho nia rekursu menus labele kobre hotu, Governu tenke hare’e hodi rekruta tan mais ou menus iha Postu Lore nain 10 hanesan ne’e atu bele kobre hotu ba ai laran sira hodi asegura floresta sira ho diak. Prokupasaun kona ba rekursu hato’o beibeik ona ba governu maibe seidauk iha rezultadu.

“ Agora nee ami kolobora ona ho governu hodi  proteze ba balada fuik sira hanesan rusa fuik,meda,lekirauk,manu sira nomos proteze animal iha tasi no ailaran tuan  tamba ami mos komprende ona no ami mos partense ba parke nasional nino konis Santana nian entaun ita tenki proteze” dehan Komunidade Jose da costa iha nia rezidensia aldeia Horolata postu adminastrivu Lore 31/05

Nia afirma iha ema balun sei hanoin kasa ba balada fuik sira maibe la besik  iha parke nasional nee maibe iha parte ninin sira,  so ema sira kasa nee maioria mak husi Lospalos villa maibe kuandu  sira  hetan  informa kedas ba autoridade local sira hodi halo intervensaun no iha parte ida dalaruma sira lahatoo informasaun tamba hanoin ba sira necesidade familia nian.

Lore oan nee husu governu atu kria kondisaun ba komunidade sira nia nesesidade hafoin haforsa  lei floresta nian nunee bele regularisa ba aktividade kasa no proteze animal tasi no ailaran tuan sira

“Ha’u senti lei mos ladun forsa atu regulariza ba komunidade sira halo aktividade kasa no halo toos maibe atu haforsa lei nee governu presisa kria mos kondisaun ka loke kampu serbisu ba nia povu  nunee sira bele garantia hodi atende ba nesesidade familia nian”

Maske sira hetan ona informasaun autoridade local no governu bandu ona ai-horis sira iha parke nasional maibe iha ibun deit tamba seidauk fo garantidu ba komunidade hodi garante

“Ami iha parke nasional nee precisa kampo serbisu hodi sustenta ba ami nia moris tamba  realidade komunidade nian mak hatudu dadaun nee,sira tenki ser halo aktividade kasa no halo toos mak foin bele atende ba nesesidade familia nian, sei kuandu governu loke ona serbisu ba ami, semak loron kalan ba estraga fali balada fuik no aihoris sira nee,  “ Jose Haktuir

Komunidade ne’e hateten sira iha area lore ne’e kada tinan halo toos nafatin toos tuan too tinan liman no bainhira halo toos foun sei informa ba autoridade local no guarda florestal nune bele autoriza ai nebe mak merese atu taa iha toos laran ,

ho regulamentu ne’ebe iha ba halo toos nee, sira konsidera laiha kualidade ba aihan sira ne’ebe kuda iha toos tamba laiha produsaun nebe kualidade.

Toos ne’ebe komunidade sira halo nee kuda ho aifarina,batar,fehuk, lakeru, Nú no Hudi maibe sira labele faan ba iha markadu tamba prudusaun tuir deit nessesaria tamba kualidade ladiak.

Dadaun nee governu tau ona seguransa guarda floresta iha lore nunee bele kontrola ba komunidade sira nebe kasa animal fuik sira no iha tasi  nomos halo intervensaun ba komunidade nebe halo toos foun iha parke nasional nino konis Santana

Iha sorin seluk tuir Virissimo  de Asuncao hanesan xefe aldeia Tchai, suku Lore I, postu administrativu Lore nia total populasaun iha aldeia ne’e familia 252 mane 551 feto total hamutuk 1154

“Ita nia Parke Nasional Nino Conis Santana ne’e problema ba ita kondisaun seidauk iha, loloos ne’e ema ne’ebé haree ba parke nasional ne’e importante tanba kondisaun nesesidade komunidade hela iha ne’e nafatin ba kasa animal fuik, ha’u haree iha ne’e la iha rai tetuk hodi halo toos, natar  entaun atu halo toos tenke muda no tesi ai nafatin” dehan xefe aldeia Tchai, Virissimo de Assuncao iha sede aldeia 31/05/2024

Xefe aldeia haktuir tempu uluk area Parke Nasional Nino Conis Santana ne’e  furak los, iha 1980 sira ne’e komunidade sira tesi ai hodi halo lutu de’it, maibe agora ne’e komunidade barak no balun tesi ai hodi konstrui uma nune’e  iha area parke nasional ne’e ladun matak ona

“Tara bandu seidauk iha maibe iha lei suku mak bandu kasa ilegal, tesi  ai maske iha ne’e guarda floresta maibe nain ida de’it  tinan 2013 ne’e mak aumenta tan nain rua agora nain tolu dalaruma area ne’e  luan sira la bele perkore hotu”

Xefe aldeia Tchai dehan  iha ne’e  nesesidade obriga  komunidade balun ba estraga  ai-kameli, no atividade kasa uluk too agora halo nafatin tanba mudansa klimatika oinsa sira ba hola na’an iha merkadu, entaun komunidade sira tun ai-laran kasa nafatin animal fuik sira  maibe bandu labele fa’an iha merkadu no kasador sira lao uja kilat ho marka senafan ba atividade kasa.

Informasaun ne’e jornalista sira rekolla liu husi atividade media tour ne’ebé  organiza husi Asosiasaun Jornalista Timor Lorosa’e AJTL) servisu hamutuk ho Oxfam iha Timor-Leste, no hetan fundus husi Oxfam Hongkong hodi halo kobertura kona ba asaun justisa klimatika iha Postu administrativu Lore munisipiu Lautem.

Print Friendly, PDF & Email

LEAVE A REPLY

Please enter your comment!
Please enter your name here