Reportajen Ekipa Neon Metin
Organizasaun naun Govermental, Forum Komunikasaun ba feto Timor Lorsa’e (Fokupers) kondena aktu Asedu Sexual Primeriu Ministru (PM) Kay Rala Xanana Gusmão, ne’ebé Viral iha media sosial. Maibé Fokupers seidauk simu keixa ruma husi vitima asedu sexual.
Diretora Ezekutivu Forum komunikasaun ba feto Timor Lorsa’e (Fokupers) Domingas Afonso Amaral hateten, kazu asediu sexual sai hanesan fenomena iha media sosial, , dala barak kazu asediu sexual ne’e akontese, tanba deit buat ida poder. Ema dalaruma uza nia poder, atu bele halo asediu sexual ba ema seluk, dalabarak akontese ba feto, feto maka sempre sai vitima ba iha asediu sexual.
Aktu ne’ebé maka Primeiru Ministru Kay Rala Xanana Gusmão halo no viral iha media sosial, ne’e nu’udar aktu ida asédiu sexual hasoru feto sira, tanba ne’e Fokupers kondena hahalok aat ida hanesan ne’e.
“Ita la haree ba ema se de’it, hanesan sosiedade ema hotu, tantu nia iha pozisaun save ka nia iha pozisaun baibain, ita presiza halo tratamentu iguál, tanba ne’e, ami kondena hahalok sira hanesan ne’e,” Dehan Diretora Ezekutivu Fokupers, Domingas Afonso Amaral iha Delta Nova, Sexta 26/07.
Nia haktuir, bainhira feto ida kuandu hetan asedu sexual, ida ne’e fo ameasa boot ba iha ninia an rasik, tanba nia hetan presaun husi sosiedade, komunidade ema hotu-hotu fó presaun ba nia. Bainhira se deit maka fahe tutan video ne’ebé maka viral iha media sosial, ida ne’e mos kontribui ona ba hahalok aat ida asediu sexual ne’e.
“Bainhira ita share tutan video ne’ebé maka iha ba media sosial, loloos ita mos kontribui atu promove hahalok ida ne’e. Dala barak publiku hanoin ida ne’e hahalok baibain. Tanba ne’e maka ami uza maneira, atu halo advokasia no fo mensajen posetivu sira ba iha publiku atu nune’e bolu atensaun ema hotu-hotu nian katak hahalok asedu sexual ne’e ema hotu kondena hahalok ida ne’e,” nia dehan.
Nia esplika, dala barak kazu asediu sexual Fokupers rezista ne’e lori ba iha Ministériu Publiku, no halo karta lamentsaun ba iha instituisaun no haruka ba iha instituisaun relevante. Liuliu ba ema ne’ebé maka halo asedu sexual, Fokupers halo karta ba iha nia instituisaun atu bele fó sansaun indisplinar ba pesoal ne’ebé halo asediu sexual.
Maibé kona-ba ida agora viral ne’e vitima seidauk mai keixa iha organizasaun Fokupers, tanba ne’e Fokupers seidauk bele halo asaun ruma, bainhira vítima mai keixa, fokupers bele halo asaun no halo karta ba iha instituisaun refere.
“Nia kestaun maka, ita laiha keixa ida husi vitima rasik ne’ebé mak agora viral hela, maibé ita nafatin iha obrigasaun hodi halo advokasia, halo sensiblizasaun iha media sosial bolu ema hotu-hotu nia atensaun atu bele hapara hahalok aat ida asedu sexual ba ema iha fatin ne’ebé deit,” tenik nia.
Fokupers kontinua fahe informsaun sira iha media sosial, oinsa ema hotu-hotu bele iha konsensia atu hapara hahalok aat ida ne’e. tanba hahalok ida ne’e fó presaun ba feto no ida ne’e bele lori trauma narauk ba feto, no komunidade sei nafatin fo sala no ema ne’e sei senti moe no tauk atu sai tanba sosiedade sira sei ko’alia barak kona-ba nia.
Ho ida ne’e Fokupers husu ba entidade hotu-hotu, atu hapara no kondena hahalok asédiu sexual iha ne’ebé deit, tantu iha publiku, iha servisu fatin.
