Reportajen Silvino Freitas
Sekretáriu Jeral FRETILIN Mari Alkatiri konsidera ejijensia ba salariu mininu ba klase traballadór tenke iha vizaun global ba dezenvolvimentu no traballadór sira bele iha servisu diak ba ekonomia sustentavel, nunee mos governu tenke garante kualidade traballadór atu iha retornu diak ba ekonomia sustentavel.
Tuir Sekretariu Jeral FRETILIN Mari Alkatiri dehan, ejijensia ba salariu dignu no kondisaun dignu ba servisu ba governu nee justu no lejetimu hotu atu halo ejijensia maibe ejijensia sira nee tenke vizaun global, ejijensia ba governu tenke iha prinsipiu no valores no ejijensia ba governu nee tenke iha dignidade ba povu tomak nunee governu neebe ita ejije tenke halo dezenvolvimentu ho baze hodi kria kondisaun ba klase traballadór ne’ebe bele fo nia kbiit no matenek iha prosesu dezenvolvimentu no ejijensia nee ho ninia signifikadu katak klase traballadór nee manan dignu no servisu ne’ebe traballadór halo ne’e fo retornu boot liu.
“Hau hatene salariu ho $115 nee se mak bele moris, maibe hakarak ka lakohi ita hasae ba $200 se ita nia kapasidade dezenvolvimentu la akontese nee katak ita nia osan nafatin mai husi fundu minarai nee la sustentavel nafatin, ita hakarak dezenvolvimentu ba oin tenke sustentavel no osan ne’ebe ita manan tenke mai husi ekonomia ne’ebe sustentavel rai Timor-Leste nian” dehan Sekretariu Jeral FRETILIN Mari Alkatiri iha ambitu seminariu ba komemorasaun loron mundial traballador ne’ebe reliaza iha gabinete eis titular primeiru-ministro Farol,(01/05).
Eis Xefe Governu nee dehan, nia mos admira ho salariu ne’ebe emprejariu sira fo ba traballadór maski ho salariu kiik maibe sira mak kuida emprejariu sira nia osan retornu loja nian iha kaisa, nunee reklamasaun ba salariu mininu tenke tuir sustentabilidade ekonomia nasaun nian maibe governu nee la kria ba sustentabilidade ekonomia, nunee mos dadaun nee emprejariu projetu sira fo pursentu ne’ebe diak ba broker sira maibe labele selu diak ba traballadór sira, nunee tenke iha retornu justu hodi fo salariu justu ba traballadór sira.
