Reportajen Silvino Freitas
Komisaun Reguladora Arte Marsiais (KRAM) konsidera to’o dadaun ne’e membru arte marsial sira hanesan Persaudaraan Setiah Hati Terate (PSHT) Kmanek Oan Rai Klaran (KORK) ho Ikatan Kera Sakti (IKS), kontinua la obedese no halo infrasaun hasoru resolusaun governu nian ba suspensaun pratika atividade arte marsial, no mós publika sira nia atividade iha Facebook.
Prezidente KRAM Octavio da Conceição dehan, membru arte marsial sira nafatin komete infrasoen hasoru rezolusaun governu nian ne’ebé disidi suspende atividade pratika arte marsial nian, nune’e membru sira husi arte marsial kontinua la obedese ba resolusaun numeiru 22 2024 7 de abril ne’ebé kontinuasaun ba resolusaun husi númeru 45 2023 dia 10 novembro nian ne’ebé governu hasai atu suspende pratika atividade arte marsial iha teritorio Timor Leste laran tomak maibe fulan ida ne’e nia laran komandu operasaun polísia nian kontinua deteta no halo kapturasaun ba membru sira ne’ebé la kolabora ho entidade seguránsa no la obedese ba lei no resolusaun ne’ebé governu fo sai.
“Membru organizasaun arte marsial sira hanesan PSHT, KORK no IKS ninia membru sira ne’ebé kontinua la obedese ba resolusaun governu” dehan prezidente KRAM Octavio da Conceição liuhusi konferénsia imprensa iha iha salaun Dalan ba Dame Lesidere, (17/06).
Nia dehan tan, iha sabadu iha suku Lahae Aileu komandu PNTL Aileu halo passa revista ba joven sira ne’ebé hakarak halo viajen ba nossa senora Ramelau polísia kaptura joven sira ne’ebé utiliza farda ne’ebé kaptura joven nain 6 ho motor uza sira nia farda iha pasta laran no hatudu sira nia atrasaun iha estrada laran, nune’e mos iha loron segunda feira 16 de junu komandu unidade imigrasaun kaptura farda lubuk ida husi organizasaun PSHT ho IKS ne’ebé farda sira ne’e haruka mai husi railiur.
“Komando prende ne’e ita konsidera infrasoen ka imkomprimentu legal orden estadu nian liuhusi resolusaun númeru 22/2025 dia 7 de abril” dehan Octavio.
Nia mós informa tuir KRAM nia observasaun no asesu ba media sosiál iha publisidade balun husi organizasaun KORK ne’ebé iha loron sakrifisiu sira abertamente nia líder sira deklara laiha atividade husi membru sira maibé ninia membru sira hasai foto iha uma laran no publika sai iha iha facebook, husi hahalok sira KRAM konsidera membru sira husi arte marsial kontinua la hatudu komportamentu ho kooperasaun ne’ebé di’ak ho entidade suku sira nomós iha publisidade balun ne’ebé halo husi estudante sekudariu sira halo iha Dili laran la utiliza farda maibé hakerek sira nia organizasaun nia naran.
“Ne’e ami konsidera publisidade ne’ebé kontinua la kumpri resolusaun ne’ebé governu hasai, tanba ne’e husu ba dirijente eskola sira atu bele kontrola estudante atu ba eskola karik labele hakerek sira nia organizasaun nia naran iha farda eskola nian, nune’e husu ba lideránsa hotu organizasaun arte marsial 3 ne’e para atu koolabora autoridade seguránsa liuliu OPS suku sira hodi ita hotu hotu kumpri nafatin resolusaun ne’ebé fo sai hodi hein too dia 31 dezembru tinan ida ne’e ba dezisaun governu nian tuir mai” konklui prezidente KRAM Octavio da Conceição.
