Reportajen David da Costa
Sua Eminência Dom Virgílio Cardeál do Carmo da Silva, hamutuk ho grupu Familia orasaun Arcanjo (FOA) ne’ebe mak akompaña husi Lia-na’in Veterano no sarani sira, halo’o lansamentu fatuk dahuluk ba konstrusaun Monumentu São Miguel de Arcanjo iha foho Malinamoc Beduku tutun, iha suku Comoro Postu Administrativu Dom Aleixo, Munisípiu Dili.
Iha serimónia lansamentu fatuk dahuluk ba konstrusaun monumentu São Miguel de Arcanjo ne’e, Veteranu Nelio Quintão “Lagartoˮ nu’udar lia-na’in, husu ba komunidade sira atu koopera ho obra monumentu São Miguel de Arcanjo nian ne’ebe maka halo iha foho Malinamoc Beduku tutun ne’e, tanba uluk funu Igreja nian kontribuisaun moos bo’ot tebes.
“Ha’u koopera ho obra atu hari’i iha fatin ne’e tanba uluk prosesu luta ba ukun rasik aan igrja ninia kontribuisaun bo’ot tebes ba rai ida ne’e, ho ida ne’e husu ba komunidade sira ne’ebé hela besik iha área ida ne’e ita bele kolabora hamutuk to’o obra ne’e remata,” Dehan Veteranu Nelio Quintão “Lagartoˮ, Iha Foho Malinamoc Beduku, Sabadu 12/07.
Iha fatin hanesan, Sua Eminência Dom Virgílio Cardeál do Carmo da Silva, hatete, ohin loron mai iha foho Malinamoc hamutuk ho familia São Miguel hodi marka istória ida atu hari’i monumentu Anju São Miguel de Arcanjo ninian iha foho Malinamoc Beduku tutun ne’e.
“Ita hari’i monumentu São Miguel de Arcanjo iha foho Malinamoc ne’e ho finalidade ita iha ita-nian mahein atu defende, proteje ita no bali ita husi buat aat hotu. Fiar katak husi familia bo’ot São Miguel de Arcanjo nia devosaun hakarak konvida ita hotu atu mai hari’i monumetu ne’e atu sai ita hotu nia mahein. Ohin loron ita hamutuk iha ne’e ofisialmente atu konsagra fatin ida ne’e sai fatin úniku, fatin santu no fatin ne’ebé lori ita sarani besik liu bá maromak no mai hodi harohan,” dehan Sua Eminência Dom Virgílio
Tanba ne’e ohin halo ona lansamentu espera obra ida ne’e bele lori to’o rohan hodi mai fali halo inagurasaun, tamba monumentu ne’e la’os familia Orasaun Arcanjo ninian deit, maibé ba sarani sira hotu nian.
Hari Monumentu São Miguel de Arcanjo iha Malinamoc ne’e inisiativa rasik husi grupu Familia Orasaun Arcanjo (FOA). no laiha apoiu orsamentu ruma husi se deit, maibé ida ne’e konsiensa husi grupu FOA nia kontribuisaun rasik maka hari’i monumentu refere.
Serimónia lansamentu hatuur fatuk dahuluk ne’e, partisipa husi reprezentante parókia Maria Auxiliadora Comoro Dili, Membru Polísia Nasional Timor-Leste (PNTL) husi eskuadra munisípiu Dili inklui komunidade sira hotu husi Beduku ninian.
