Reportajen Silvino Freitas
Advogadu privadu kompana Seagoull Resourt haree ona dokumentu husi kompana katak jogu online, neebe halo iha otel Oeupu Rejiaun Administrativu Oecusse Ambeno (RAEOA), hetan autorizasaun husi governu liuhusi Insepesaun Jeral Jogu, nunee prosesu implementasaun jogu refere lao tuir koridor prosesu adminitrativu nian, maibe buska neebe Polisia Servisu Investigasaun Kriminal (PSIK) no Servisu Nasional Intelejensia (SNI) antes nee halo konsidera desmantela rede kriminozu tranznasional neebe konesidu iha zona ASEAN.
Advogadu Octavio Cardosso dehan, prosesu nee husi parte PSIK halo aprendesaun ba objetu balun neebe maka iha indisius ba jogu ilisitu maibe sira halo aprosimasaun katak iha rajaun neebe oinseluk, nunee nia hanesan defeza ba kompana haree katak prosesu nee sei hamosu duvida iha termu prosesu ba regra atividade nian tanba iha lisensa neebe depozita konfiansa ba ema estranjeiru Xineza no Indonesia hodi halo atividade jogu refere no iha mos prosesu administrativu neebe lao tuir nia koridor no halo iha fatin neebe publiku ema hotu hatene fatin neebe sira halao atividade nomos iha traballador timoroan iha laran.
“entendimentu nee buat ketak ida maibe mantein ami nia pozisaun katak depois mak ita hetan nia rezultadu iha aban, aprendesaun buska nee tenke mandadu husi tribunal maibe kolega sira mai laiha mandadu ida nee mak halo hau duvida, entermu implementasaun lei difikulta uituan prosesu kuandu lori ba tribunal laiha mandadu” dehan advogadu Octavio Cardosso iha Otel Oeupu, (27/08).
Octavio dehan tan, nia hanesan advogadu observa ona dokumentus husi kompana Seagoull nunee husi dokumentu sira nee nia nota katak jogu refere hetan autorizasaun husi Insesaun Jeral Jogu nian, nunee jogu nee hetan autorizasaun adnimistrativamente husi RAEOA, no kompana jogu nee mos iha kontratu ho governu ba Otel Oeupu neebe uza hodi realiza jogu online, nunee nia hanesan defeza haree katak jogu hetan autorizasaun husi governu sentral no RAEOA.
“ami iha esperensia neebe lei haruka katak buska sira hanesan nee tenke iha komunika ema nia mandatariu iha oin molok buska revista halo identifikasaun alista sasan sira neebe deskonfia uza ba atividade tenke iha mandatariu maibe halo henesan nee sei prejudika prosesu iha future” dehan advogadu Octavio.
Entretantu iha tersa feira kalan PSIK ho SNI halo buksa aprensaun ba jogu online neebe halo iha otel Oeupu Oecusse no konsidera jogu refere deskonfia iha atividade ilisitu ho krime oin rua maka sira identifika maka esplorasaun ba jogu ilisitu no burla informatika, nunee iha buska nee PSIK haree katak iha esplorasaun ba jogu ilisitu maka sira prende desktop unidade 87, laptop 13, telemovel 194, flash disk 3, access poin wifi 1, starlink ruter 2, sim card telkomsel Indonesia nian iha 135 iha fali burla informatika nee sira halo aprensaun desktop 58, leptop 4, impresora 1 ho makina sura osan 1, access point 2, telemovel iha 44, nunee buska aprensaun PSIK nian nee desmantela rede kriminozu transnasional neebe konesidu iha zona ASEAN nian neebe akontese ona iha Myanmar, Cambodia, Filipina.
