Reportajen Umbelina dos Reis
Manifestasaun ne’ebé Estudante Universitariu Timor-Leste (EUTL), organiza durante loron tolu ne’e manifestante sira halo asaun pasifika hasoru Parlamentu-Nasional (PN), ne’e estudante sira sempre halo limpeza ba lixu plastik sira hafoin remata manifestasaun iha areadores kampus sentrál Universidade Nasional Timor-Lorosa’e (UNTL), tanba joven hadomi ambente.
Prezidente Repúblika Jose Ramos Horta hateten manifestasaun ne’ebé akontese iha Timor-Leste sei la fo impaktu ba Timor atu sai membru ASEAN tanba problema ne’e akontese iha rai hotu-hotu no inklui nasaun America manifestasaun akontese lor-loron.
“Ha’u hare no rona bainhira manifestasaun remata manifestante sira fila hamos rai ka lixu ne’ebé namkari iha sidade laran, ne’e uniku no sai lisaun boot ba iha mundu internsional.” Dehan Prezidente Repúblika Jose Ramos Horta, ba Jornalista sira iha Auditoriu Arkivu Muzeum rezisténsia Max Sthall, kinta-feira, 18/09.
PR dehan, Manifestasaun ne’e di’ak liu fali atividade sira ne’ebé ita realiza iha Dili laran, tanba bainhira manifestasaun hotu joven sira hamos fila-fali ambiente, maibé atividade ne’ebé bain-bain realiza iha Dili laran bainhira arividade hotu nein ema ruma preokupa lixu ne’ebé namkari iha rai, maibé estudante halo manifestasaun ne’e hatudu ezemplu di’ak ba ema hotu iha mundu.
