Reportajen Umbelina dos Reis
Sekretáriu Estadu Formasaun Profissional no Empregu (SEFOPE), liu hosi Diresaun Nasionál Empregu Estranjeiru (DNEE), ohin 20/10/ 2025 anunsia resultadu vaga online Nova Zelândia.aplikante sira ne’ebe pasa iha selesaun dokumentus ba vaga Online Nova Zelândia nia total hamutuk 2.186, nune’e sei tuir tan intervista lingua Inglés pre-intermediu iha tempu badak.
Diretor Jeral Sekretariu Estadu Formasaun Profesional no Empregu (SEFOPE), Carlito Rosario Cabral hateten, ohin SEFOPE anunsiu resultadu rekrutamentu vaga online Nova Zelândia nia ba publiku ba sistema RSE ba kandidatu sira ne’ebe atu ba servisu iha Nova Zelandia.
Ita hotu-hotu akompaiña ba prosesu ne’ebe SEFOPE halo hahu iha 08-13 setembru SEFOPE loke oportunidade ba joven sira hodi aplika ba vaga Nova Zelandia liuhosi sistema online. Aplikante liuhosi sistema online hamutuk 20.858 kandidatus mak rejistu iha sistema online, depois rejistu durante loron lima, SEFOPE halo verifikasaun ba selesaun dokumentus bazeia ba kritériu ka rekezitus ne’ebe empregador sira hakarak.
“Aplikante sira ne’ebe rejistu tuir kritériu ne’ebe pasa SEFOPE fo sai hamutuk 2.186 mak pasa iha selesaun dokumentus hodi bele tuir intervista lingua Inglés baziku iha SEFOPE, nune’e SEFOPE sei entrega dadus ba empregador. Maibe aplikante sira ne’ebe la pasa hamutuk 18.688 tanba sira priense la tuir rekezitus.” Dehan Diretor SEFOPE Carlito Rosario Cabral, ba Jornalista sira iha edifísiu SEFOPE Caicoli, Segunda-feira, 20/10.
Nia informa, hosi munisipiu Aileu aplikante mane 86, feto 49, hamutuk 135 mak pasa iha selesaun dokumentus, Ainaro mane 108, feto 57 hamutuk 165, Atauro na’in 8 mane de’it, Baucau mane 150, feto 87, hamutuk 257, Bobonaru mane 156, feto 43, hamutuk 199, Covalima mane 95, feto 33 hamutuk 128, Dili mane 211, feto 116 hamutuk 327, Ermera mane 115, feto 36, hamutuk 151, Lautem mane 147, feto 64 hamutuk 211, Liquica mane 44, feto 14 hamutuk 58, Manatutu mane 78, feto 21, hamutuk 100, Manufahi mane 47, feto 27, hamutuk 70, Oekusse RAEOA mane 30, feto 3 hamutuk 33, no Vikeke pasa mane 235, feto 94 hamutuk 329.
“Aplikante sira ne’ebe pasa iha selesaun dokumentus sei intervista tuir orariu ne’ebe SEFOPE sei fo sai iha loron aban, nune’e aplikante sira tuir intervista ho nivel koñesimentu lingua Inglés pre-intermediu, aplikante sira ne’ebe pasa ona selesaun dokumentus sei tuir intervista iha SEFOPE Nasionál. Aplikante sira ne’ebe la pasa iha selesaun dokumentus sei iha oportunidade tinan oin mai.”
