Reportajen Silvino Freitas
Primeiru Ministru Xanana Gusmão konsidera 28 novembru ne’e loron atu selebra korajen, tanba iha momentu difisil ne’ebe timoroan foti desizaun atu hetan apoia, nune’e mosu Delegasaun em FRETILIN no Servisu Exterior (DFSE) hodi haruka Marí Alkatiri, Ramos-Horta, Rogerio Lobato no sira seluk hodi informa ba mundu katak Timor-Leste ne’e RDTL tiha ona.
PM Xanana Gusmão dehan, 25 abril ne’ebe mosu iha Portugal nune’e iha Timor-Leste mos mosu partido sira hanesan UDT APODETE no APODETE hanoin katak bainhira Portugal sira fila ba sira nia rain entaun Timor-Leste susar tanba atu uza osan saida, maski nune’e sira laos hakarak Indonesia maibé ita nia nasaun ne’ebe menus preparasaun atu sai estadu ida, hanesan mos UDT ne’ebe hanoin bainhira ukun an ita sei laiha rekursu umanu ne’ebe atu dezenvolve nasaun.
“Ikus sira hanoin katak iha periodo tranzisaun ne’ebe bele prepara rekursu umanu, atu ukun an ita bele halo buat ruma, maibé FRETILIN dehan independénsia imediata” dehan PM Xanana iha ambitu komemora tinan 50 loron proklamasaun indepedensia iha Palaban Oecusse, (28/11).
Nia dehan tan, sira ne’ebe proklamadores sira mate hotu ona balun mak sei moris ohin hamutuk ho Prezidente Repúblika iha Dili hamutuk ho sira hodi presta omenajen, nune’e proklamasaun indepedensia ne’e akontese tanba inimigu Indonesia sira hahú dudu ona populasaun iha fronteira hanesan Batugade Maliana liu ba ona Suai maka FRETILIN hamriik hodi proklama tiha republika ida harii tiha governu hodi haruka membru governu ba liu hodi dehan katak Timor-Leste indepedensia ona atu ONU bele defende ita.
“Tanba ne’e maka mosu DFSE delegasaun em FRETILIN no servisu exterior, senor Marí, Ramos-Horta lubuk ida kedas servisu iha neeba hodi fo hatene katak ita ne’e RDTL tiha ona” dehan PM Xanana.
Nia dehan, desizaun neebé hasai iha tinan 50 liu ba dezisaun neebe korasoju tebes tanba mundu abandona tiha ona ita nune’e ita ohin ita presta omenajen, momentu korasoju ih tinan 50 liu ba nee atu lori ema hotu atu iha momentu difisil bele hasai desizaun ne’ebe difisil, difisil tebes tanba iha embaixada Australia iha Jakarta atu buka apoiu ba ita nasaun ne’ebe atu apoia ita maka nasaun sira husi CPLP maibe nasaun CPLP iha Afrika mos foin ukun an ne’ebe sei susar tebes, atu kompleta difisil nee mak liu tiha 28 novembru forma ekipa hodi haruka timoroan balun buka apoia ba situasaun difisil nee hodi balun koalia iha ONU atu defende Timor-Leste mos hakarak ukun an.
“Ne’ebe ita ohin selebra korajen timoroan sira nian atu infrenta situasaun ne’ebe difisil, atu fo hatene ba imi hotu liuliu ba joven sira katak lalika tauk kuandu infrenta situasaun ne’ebe kompleksu no difisil” nia konklui.
