Reportajen David da Costa
Polémika kona-ba prosesu rekrutamentu foun ba ajente Polísia Nasionál Timor-Leste (PNTL) sai debate públiku tanba mosu irregularidade iha faze selesaun kandidatu sira. Tanba ne’e, Governu deside kria komisaun independente ida ne’ebé envolve polisia Timor-Leste no mós polísia husi Portugal no Austrália, atu halo avaliasaun ba prosesu rekrutamentu kadetes foun sira.
Primeiru-Ministru Ky Rala Xanana Gusmão, hatete Governu deside ona suspende temporariamente prosesu rekrutamentu PNTL nian, hafoin mosu preokupasaun husi kadetes foun PNTL balun kona-ba falta transparénsia no indikasaun irregularidade iha prosesu rekrutamentu ne’e.
Tanba ne’e sei harii komisaun independente ida ne’ebe kompostu husi reprezentante polísia Timor-Leste nian hamutuk ho polísia husi Portugal no Austrália, hodi forma komisaun internasionál ida atu halo revizaun kompletu ba prosesu rekrutamentu. Komisaun ne’e sei identifika sala sira iha prosesu rekrutamentu ne’ebé presiza korrije no fó rekomendasaun ba Governu.
“Problema rekrutamentu ba polísia sai problema boot ida. Ami diskute ona ho Ministru Interior no deside atu suspende tiha prosesu ne’e tanba iha indikasaun katak problema ne’e eziste duni no presiza verifikasaun,” dehan Primeiru Ministru Kay Rala Xanana Gusmão ba jornalista sira iha Palásiu Prezidensiál, Bairo-Pite, lKinta 12/02.
Nia hatutan katak komisaun ne’e sei garante katak prosesu rekrutamentu hala’o ho transparénsia, justu no tuir padraun profisionál, molok Governu foti desizaun foun atu kontinua ka reorganiza fila-fali prosesu simu ajente foun sira.
“Kria komisaun ida husi polisia rasik ita nia ho polisia sira husi Portugal no Australia mai hanesan komisaun internasional ida hodi haree didi’ak hotu, iha sala ne’ebe atu kuriji, hodi bele hasai dezisaun foun ka halo foun fali hodi haree katak saida maka presiza atu hadi’a hodi simu polisia foun,” nia subliña.
Entretantu, Konsellu Ministrus aprova ona Projetu Rezolusaun Governu ne’ebé aprezenta husi Ministru Interior, Francisco da Costa Guterres, kona-ba suspensaun temporária no revizaun ba Konkursu Públiku Admisaun iha Kursu Formasaun Ajente PNTL nian.
Ho desizaun ida-ne’e, Governu hakarak asegura transparénsia, legalidade no kredibilidade iha prosesu rekrutamentu, konsidera dúvida no preokupasaun sira ne’ebé hato’o husi kandidatu sira no entidade relevante kona-ba kumprimentu rekizitu no regularidade iha faze konkursu.
Rezolusaun Governu mós prevee reestruturasaun ba Komisaun Monitorizasaun no Fiskalizasaun, liuhusi integrasaun membru nasionál no internasionál independente sira, no halo revizaun kle’an ba faze hotu-hotu iha prosesu selesaun, atu apura faktu sira no adota medida koretiva bainhira presiza.
Liuhusi medida ida-ne’e, Governu iha intensaun atu hametin konfiansa sidadaun sira iha instituisaun públika no garante katak asesu ba PNTL hala’o ho justu, imparsiál no tuir lei.
